दावडी, ता. १९ ः वाढती थंडी, अपुरा सूर्यप्रकाश व हवामान बदलामुळे फुलझाडांचा बहर कमी होणे, बहाराचा काळ बदलणे अशा प्रकारचे परिणाम त्यांवर दिसत आहेत. यावर उपाय म्हणून खरपुडी बुद्रुक (ता. खेड) येथील शेतकरी झाडांना प्रकाशासाठी शेतात विद्युत बल्ब लावत आहेत.
फुलझाडांच्या वाढीसाठी सूर्यप्रकाश महत्त्वाचा असतो. हिवाळ्यामध्ये लवकर दिवस मावळतो त्यामुळे झाडांना पुरेसा सूर्यप्रकाश मिळत नाही. या झाडांची उंची वाढत नाही व लगेच कळी पकडली जाते. या कारणांमुळे फुले कमी येतात. यासाठी संपूर्ण शेतामध्ये विद्युत बल्ब बसवण्यात येत आहेत. दिवस मावळताच हे बल्ब चालू करावे लागतात जेणेकरून फुलझाडांना पुरेसा प्रकाश मिळून झाडांची योग्य वाढ होते.
‘‘हवामानामध्ये बदल झाला की ढगाळ वातावणामुळे या झाडांवर किड, मवा असे रोग येतात. यावर औषध फवारणी करावी लागते व झाडाच्या वाढीसाठी ४० ते ४५ दिवस रोज दिवस मावळला की बल्ब लावावे लागतात. संक्रातीनंतर या बल्बची गरज नसते कारण तेव्हा दिवस मोठा होत जातो,’’ अशी माहिती खरपुडी मांडवळा येथील शेतकरी निखिल गायकवाड व दुर्गादास पडवळ यांनी दिली.