घोडेगाव, ता. २५ : पुणे जिल्ह्यामध्ये आयसीटी स्कूल प्रोजेक्ट अंतर्गत समग्र शिक्षा अभियान मुंबईतर्फे पुणे जिल्ह्यातील जिल्हा परिषद शाळा, खासगी अनुदानित शाळा आणि शासकीय आश्रमशाळा अशा एकूण १८० शाळामध्ये या उपक्रमाअंतर्गत संगणक प्रशिक्षण शाळा उभारण्यात आलेल्या आहेत. विद्यार्थ्यांची संगणक प्रयोगशाळेच्या माध्यमातून हजेरी वाढविण्यासाठी प्रयत्न यशस्वीरीत्या होत आहेत. डिजिटल प्रोजेक्टर अंतर्गत पुणे जिल्ह्यातील शाळेमध्ये व BRC मध्ये संगणक शिक्षणाचे विद्यार्थी धडे घेत आहेत.
पुणे जिल्ह्यात एकूण १८० शाळेमध्ये ११ संगणक, ०१ प्रोजेक्टर, ०१ युपीएस, ०१ डिजिटल बोर्ड आणि ११ हेडफोन तसेच एका संगणक शिक्षकाची नेमणूक स्किल ट्री कन्सल्टिंग प्रा.लि. मुंबईतर्फे करण्यात आली आहे. हे संगणक शिक्षक आपल्याला नेमून दिलेल्या शाळेमध्ये वर्ग ६ ते १२ वी च्या विद्यार्थी, विद्यार्थिनींना संगणकाचे प्रशिक्षण नियमितपणे देतात. तसेच या उपक्रमाचा फायदा सर्व शाळामध्ये मुलामुलींना झालेला दिसून येत आहे.

जिल्हा परिषदेच्या शाळा कमी पटसंख्येअभावी बंद पडण्याची परिस्थिती निर्माण झाली आहे. ग्रामीण भागातील विद्यार्थ्यांची संगणक प्रयोगशाळेच्या माध्यमातून हजेरी वाढविण्यासाठी प्रयत्न केले जात आहे. शिक्षणाचा दर्जा उंचावण्यासाठी आधुनिक काळात संगणकाशी मैत्री करावी लागेल व ते हाताळण्याचे शिक्षणही घ्यावे लागेल हे उद्दिष्ट समोर ठेवून, महाराष्ट्र प्राथमिक शिक्षण परिषदेद्वारे कम्युनिकेशन इन्फॉर्मेशन टेक्नॉलॉजी (आयसीटी) हा उपक्रम राबविल्या जात असून, या अंतर्गत पुणे जिल्ह्यातील १८० शाळांमध्ये संगणक प्रयोगशाळा स्थापित केल्या आहेत.

खासगी शाळांप्रमाणेच जिल्हा परिषदेच्या शिक्षणाचा दर्जा उंचावण्यासाठी विविध योजनांची अंमलबजावणी केली जात आहे. केंद्र आणि राज्य शासनाच्या माध्यमातून शाळा तेथे संगणक हा उपक्रम राबविला जात आहे.
अशी माहिती जिल्हा समन्वयक अक्षय वाढणकर व तालुका समन्वयक दिनेश पालवे टी एम इनामदार यांनी दिली.