घोडेगाव, ता. २९ ः घोडेगाव (ता. आंबेगाव) येथे पिण्याच्या पाण्याचा दूषित पाणीपुरवठा होत असल्याने शहरात शेकडो नागरिकांना उलट्या व जुलाब या साथीच्या रोगाचा वेगाने प्रसार झाला होता. आरोग्य विभाग व ग्रामपंचायत यांनी तातडीने दखल घेऊन उपाययोजना केल्याने ही साथ आटोक्यात आल्याची माहिती पंचायत समितीच्या आरोग्य विभागाने दिली आहे.
आरोग्य विभागाने दिलेल्या माहितीनुसार २३१ रुग्ण या साथीला बळी पडले आहेत. यातील २१० रुग्ण बरे झाले असल्याचे सांगण्यात आले. घोडेगाव शहरात २१ जूनला उलट्या व जुलाबाची साथ असल्याचे तालुका आरोग्य विभाग व ग्रामपंचायत त्याच्या लक्षात आले. त्यांनी त्वरित कर्मचाऱ्यांच्या पथकांची नियुक्ती करत घर टू घर उपचाराला सुरुवात केली. सध्या परिस्थिती नियंत्रणात आल्याची माहिती गटविकास अधिकारी अर्चना कोल्हे यांनी दिली.
घोडेगाव ग्रामपंचायतीचे लोकप्रतिनिधी, अधिकारी यांच्या दुर्लक्षपणामुळे सार्वजनिक पाणी पुरवठ्याच्या टाकीत टीसीएल विलीन करून स्वच्छ केले नसल्याने पाणी पूर्णतः दूषित झाले आहे. तेच पाणी नळाद्वारे दिल्याने ग्रामस्थांना जुलाब, उलट्या, मळमळ व चक्कर येत असल्याचे रुग्णांनी सांगितले. तसेच नळाद्वारे देण्यात आलेल्या पाण्याचे नमुने तपासायला दिले असता पाणी दूषित निघाले आहे. तालुका आरोग्य विभागाची सहा पथके घोडेगाव परिसरामध्ये घरोघरी जुलाब, उलट्यांचा त्रास असणाऱ्या व्यक्तींचा सर्व्हे करत आहेत. आत्तापर्यंत घोडेगाव ग्रामीण रुग्णालयात २२ रुग्णांनी उपचार घेतले असून, यातील १६ रुग्णांनी घरी सोडण्यात आले आहे. तसेच आरोग्य पथके घरोघरी सर्व्हे करत असून, यातील २३१ रुग्णांवर घरीच पथकाने उपचार केले आहेत. यातील २१० रुग्ण बरे झाले आहेत तर पाच रुग्णांचे नमुने तपासणीसाठी पाठवले आहेत. ग्रामपंचायतीला पाण्याच्या टाकीची स्वच्छता व डास प्रतिबंधक धूर फवारण्याच्या सूचना करण्यात आल्या आहेत.
जिल्हा आरोग्य अधिकारी डॉ. सचिन देसाई यांनी नागरिकांच्या घरी व घोडेगाव ग्रामीण रुग्णालय येथे भेट देऊन संबंधित परिस्थितीचा आढावा घेत सूचना दिल्या. तालुका आरोग्य अधिकारी डॉ. तुषार पवार, वैद्यकीय अधिकारी डॉ. संदीप जाधव, आरोग्य सहायक संदीप कदम, बबन राजगुरू, वैभव जोशी, आरोग्य सेवक, आशा वर्कर आदी कर्मचारी नागरिकांच्या घरोघरी जाऊन सर्व्हे करत आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.