घोडेगाव, ता. १० : कुरवंडी (ता. आंबेगाव) येथील ग्रामदैवत श्रीक्षेत्र वेळेश्‍वर भगवान मंदिर हे गावच्या पश्‍चिमेस डोंगरावर बसलेले शिवकालीन मंदिर आहे. परिसरातील कुरवंडी, कोल्हारवाडी, थूगाव, भावडी कारेगाव, पेठ, पारगाव तर्फे खेड या सातगाव पठार ग्रामस्थांचे आराध्य दैवत म्हणून वेळेश्‍वर देवावर श्रद्धा आहे.
उंच डोंगरावर वसलेल्या या मंदिराकडे जाण्यासाठी प्रशस्त डांबरी रस्ता असल्याने भाविकांना मंदिरापर्यंत जाता येते.
मंदिराला ‘क’ तीर्थक्षेत्राचा दर्जा मिळाला असल्यामुळे विकास कामे होण्याचा मार्ग मोकळा झाला आहे.

धार्मिक कार्यक्रम
- श्रावण महिन्यात दर सोमवारी होम, अभिषेक
- महाशिवरात्रीला कीर्तन आणि अन्नप्रसाद

मंदिर प्रशासनाच्या सुविधा
- प्रशस्त विनामूल्य पार्किंग
- दर्शनबारी
- पिण्यासाठी पाणी

ही काळजी घ्याल
- उंच डोंगरावर मंदिर असल्याने लहान मुलांवर विशेष लक्ष ठेवावे.
- डोंगरावर जाताना आणि येताना वाहनाची वेग मर्यादा कमी असावी.

मंदिराजवळील पर्यटन स्थळे
- पेठ जवळ असणारे सौरंग्या डोंगरावर दत्त मंदिर
- डिंभा धरण ३० किलोमीटर अंतरावर
- चास नारोडी येथील घोड नदीवरील रांजणखळगे
- श्रीक्षेत्र भीमाशंकर पन्नास किलोमीटर अंतरावर.

या मंदिराला ‘क’ तीर्थक्षेत्राचा दर्जा मिळाला असून येथे देवस्थान ट्रस्ट स्थापन न झाल्यामुळे विकास कामे करण्यास अडथळा येत आहे. येथे गुरुकुल व गोशाळा लवकरच सुरू करण्यात येणार आहे.
नामदेव महाराज वाळके, देवस्थानचे पुजारी

या परिसरात छत्रपती शिवाजी महाराज यांचे स्वराज्याची शपथ हे रायरेश्‍वराचे शिल्प लवकरच लोकवर्गणीतून साकारणार आहे.
बाजीराव महाराज बांगर

मंदिराकडे जाणारा रस्ता सध्या खड्डेमय झालेला आहे. या अडीच किलोमीटर रस्त्यासाठी शासन स्तरावर निधी मिळवून तो खड्डे मुक्त करण्याचा मानस ग्रामस्थांनी व्यक्त केला आहे. प्रशस्त बगीच्यामध्ये विविध प्रकारची खेळणी लोकसहभागातून बसवण्यात येणार आहे.
मनीषा तोत्रे, माजी सरपंच, कुरवंडी

आपत्कालीन संपर्क
सुरक्षेसाठी घोडेगाव पोलिस ठाणे फोन नंबर - (०२१३३) २४४१३३
मंचर पोलिस ठाणे - (०२१३३) २२३१५९