घोडेगाव, ता. १८ : पुणे जिल्ह्यातील आदिवासी विद्यार्थ्यांना करिअर मार्गदर्शन व व्यावसायिक कौशल्य प्रशिक्षण मिळावे, तसेच रोजगाराच्या संधी निर्माण व्हाव्यात, यासाठी घोडेगाव (ता. आंबेगाव) येथील एकात्मिक आदिवासी विकास प्रकल्प व लाइटहाऊस कम्युनिटीज फाउंडेशन यांच्यात १४ ऑगस्ट २०२५ रोजी सामंजस्य करार करण्यात आला.
हा करार आश्रमशाळा व आदिवासी वसतिगृहांमध्ये शिकणाऱ्या १४ ते ३० वयोगटातील युवकांना उद्देशून असून, त्यांना करिअर मार्गदर्शन, समाज-भावनिक शिक्षण, व्यक्तिमत्त्व विकास, व्यावसायिक कौशल्य प्रशिक्षण आणि रोजगार संधी उपलब्ध करून दिल्या जाणार आहेत.
या आंतरराष्ट्रीय पातळीवरील उपक्रमांतर्गत विद्यार्थ्यांची नोंदणी व प्रशिक्षण, आश्रमशाळा व वसतिगृहांमध्ये करिअर मार्गदर्शन सत्रांचे आयोजन, विविध व्यावसायिक कोर्सेस व प्लेसमेंटसाठी मार्गदर्शन,
सर्व उपक्रमांमध्ये लिंग, जात, धर्म वा पंथावर आधारित कोणताही भेदभाव होणार नाही. या कराराच्या मुख्य बाबी आहेत.
एकात्मिक आदिवासी विकास प्रकल्प कार्यालय हे आदिवासी विकास विभागांतर्गत प्रादेशिक कार्यालय असून कार्यक्षेत्रात पुणे, सातारा, सांगली, कोल्हापूर या जिल्ह्यांचा समावेश आहेत.

‘‘ या उपक्रमामुळे आदिवासी विद्यार्थ्यांमध्ये करिअरविषयक जाणीव, कौशल्य आणि आत्मविश्‍वास वाढून त्यांना स्वावलंबी बनण्यास मदत होणार आहे. हा करार आदिवासी समाजाच्या सर्वांगीण विकासाच्या दिशेने एक महत्त्वपूर्ण पाऊल ठरणार आहे,’’ असे प्रकल्प अधिकारी प्रदीप देसाई यांनी सांगितले.