घोडेगाव, ता. १६ ः ढाकाळे (ता. आंबेगाव) येथील प्रा. संपत मारुती ब्रह्मांडे यांना सावित्रीबाई फुले पुणे विद्यापीठाची इतिहास विषयातील पीएचडी पदवी प्रदान करण्यात आली. त्यांनी ‘‘पुणे जिल्ह्यातील आदिवासी समाजाचा सामाजिक, आर्थिक व शैक्षणिक इतिहास : एक विश्लेषण’’ या विषयावर प्रबंध सादर केला होता. प्रा. ब्रह्मांडे यांना पुण्यातील सरस्वती मंदिर रात्र महाविद्‍यालयाचे डॉ. दिपक वेडे यांनी मार्गदर्शन केले. तसेच, सावित्रीबाई फुले पुणे विद्यापीठाच्या इतिहास विभागाच्या प्रमुख डॉ. श्रद्धा कुंभोजकर, आर्ट्स ॲन्ड कॉमर्स कॉलेज, कासेगाव (ता. वाळवा, जि. सांगली) चे प्राचार्य डॉ. एस. एम. मगदूम आणि डॉ. बी. के. माने यांचेही सहकार्य केले होते.
प्रा. ब्रह्मांडे हे सांगली येथे प्राध्यापक म्हणून कार्यरत आहेत. ते घोडेगाव येथील बी. डी. काळे महाविद्यालयाच्या इतिहास विभागाचे माजी विद्यार्थी आहेत. त्यांनी ही पदवी प्राप्त केल्याबद्दल किसान सभा आंबेगाव तालुका समितीने त्यांचे अभिनंदन व्यक्त केले. किसान सभेचे डॉ. अमोल वाघमारे, अशोक पेकारी, राजू घोडे, रामदास लोहकरे, कृष्णा वडेकर, सुभाष भोकटे, दत्ता गिरंगे यांनी प्रा. ब्रह्मांडे यांना पुढील वाटचालीसाठी शुभेच्छा दिल्या.