घोडेगाव, ता. ४ : येथील एकात्मिक आदिवासी प्रकल्प कार्यालयाचे प्रकल्प अधिकारी प्रदीप देसाई यांच्या विरोधात आश्रमशाळेतील एका शिक्षिकेने दाखल केलेल्या गुन्ह्यासंदर्भात राज्यातील राजपत्रित संघटना आक्रमक झालेली आहे. अत्यंत चुकीच्या पद्धतीने जुन्नर पोलिसांनी गुन्हा दाखल केला आहे. असे झाले तर विभागातील अधिकाऱ्यांना त्यांचे अधिकार व कर्तव्य निभावणे अडचणीच होऊन बसले. त्यामुळे याबाबत मुख्यमंत्री आणि जिल्हाधिकारी आणि पोलिस अधीक्षक यांनी लक्ष घालावे आणि निष्पक्ष चौकशी करावी, अशी मागणी आदिवासी विकास विभागाच्या राजपत्रित संघटनेचे अध्यक्ष प्रदीप पोळ यांनी केली. यावर न्याय न मिळाल्यास राज्यभर आंदोलनाचा इशारा त्यांनी निवेदनात दिला.
या संदर्भात राजपत्रित अधिकारी संघटनेला प्रकल्पाधिकारी प्रदीप देसाई यांनी पत्रव्यवहार केला होता व झालेल्या अन्यायाची माहिती पत्राद्वारे दिली होती. या पत्राला प्रतिसाद म्हणून संघटनेने मुख्यमंत्री, जिल्हाधिकारी व पोलिस अधीक्षक यांना पत्र लिहून या घटनेची त्वरित चौकशी करून देसाई यांना न्याय द्यावा, अशी मागणी केली आहे.