सासवड शहर, ता. २३ : सोमुर्डी (ता. पुरंदर) येथे गुरुवारी (ता. १९) जुन्या भांडणाच्या कारणावरून झालेल्या वादात मारहाण झालेल्या जखमी जय पवार याचा रविवारी (ता. २२) सकाळी पुण्यात उपचारादरम्यान मृत्यू झाला. त्याच्या संतप्त कुटुंबीयांनी मृतदेह सासवड पोलिस ठाण्यात आणला. आरोपींना अटक करीत नाही, तोपर्यंत मृतदेहावर अंत्यसंस्कार करणार नसल्याचा आक्रमक पवित्रा त्यांनी घेतला होता. अखेर पोलिसांनी आश्वासन दिल्यानंतर मृतदेह नातेवाइकांनी नेला.
सोमुर्डी येथील जय पवार व संशयित आरोपी अष्टर मॅक्झिन शिंदे, सचिन मॅक्झिन शिंदे (रा. बोपखेल, पुणे), कोकिण पवार, विकेश पवार (रा. खडकी, श्रुती मोहल्ला), अनुराग भोसले व दोन अनोळखी व्यक्ती यांच्यात एका जुन्या भांडणाच्या कारणावरून वाद झाला. त्यांनी गुरुवारी सोमुर्डीत येऊन जय पवार यांच्यावर हल्ला केला. त्यात जखमी झाल्याने त्यांना पुण्यातील ससून रुग्णालयात उपचारासाठी दाखल केले होते. मात्र, रविवारी उपचारादरम्यान त्यांचा मृत्यू झाला. जय पवार यांच्या नातेवाइकांनी आरोपींना अटक करावी, यासाठी मृतदेह थेट पोलिस ठाण्यात घेऊन आणला. आरोपींना अटक करीत नाहीत, तोपर्यंत मृतदेह ताब्यात घेणार नाही, अशी आक्रमक भूमिका नातेवाइकांनी घेतली. यावेळी सासवड पोलिसांनी नातेवाइकांना आरोपींना अटक करण्याचे आश्वासन दिले. यानंतर नातेवाइकांनी मृतदेह शिरूरला नेऊन अंत्यसंस्कार केले.