सासवड शहर, ता. २८ : पुरंदर तालुक्यातील माध्यमिक शाळांमधील पाचवी ते दहावीला अध्यापन करणाऱ्या बहुसंख्य शिक्षकांना प्रशासनाकडून बी. एल. ओ चे काम देण्यात आलेले आहे. या कामाकरिता वर्षातील अनेक दिवस शालेय कामकाज सोडून दिलेल्या प्रभागामध्ये फिरावे लागते. शिक्षकांना अध्यापनासाठी पुरेसा वेळ उपलब्ध होत नाही. त्यामुळे अभ्यासक्रम पूर्ण करण्यामध्ये त्यांना मोठ्या अडचणीला तोंड द्यावे लागते.
नवीन शैक्षणिक धोरणानुसार आलेली ऑनलाइन पोर्टलची कामे, शिष्यवृत्ती परीक्षा, बोर्ड परीक्षा, दहावीसाठीच्या जादा तासिका, शाळा सिद्धीचे काम, यु-डायसचे काम, वेगवेगळ्या परीक्षांच्या उत्तरपत्रिकांची तपासणी अशी अध्यापनेतर इतर अनेक कामे शाळेमध्ये आणि घरीदेखील शिक्षकांना अनिवार्यपणे करावी लागतात. ती करण्यासाठी पुरेसा वेळ शिक्षकांना उपलब्ध होत नाही. त्यातच बी. एल. ओ चे काम शिक्षकांना करावे लागत असल्याने त्यांचे शाळा आणि विद्यार्थ्यांकडे पूर्णपणे दुर्लक्ष होत असते. यामुळे शाळेच्या गुणवत्तेवर आणि विद्यार्थ्यांच्या भवितव्यावर गंभीर परिणाम होत आहे. शिक्षकांना अशैक्षणिक कामे देऊ नयेत, या अनुषंगाने उपविभागीय अधिकारी पुरंदर यांना याबाबतचे निवेदन महाराष्ट्र राज्य शिक्षक परिषदेचे पुरंदर तालुका अध्यक्ष शिवहार लहाने यांनी दिले आहे.