गराडे, ता. ३ : कोडीत (ता. पुरंदर) येथे श्रीनाथ म्हस्कोबा देवाचा शाही दसरा सोहळा गुलालाची उधळण, फटाक्यांच्या आतषबाजीत मोठ्या उत्साहात झाला.
दसऱ्याच्या दिवशी पहाटे देवघरात देवांना अभिषेक घालण्यात आला. त्यानंतर सायंकाळी चार वाजता आरती होऊन देवघरातील उत्सव मूर्ती फुलांनी सजविलेल्या पालखीत ठेवण्यात आल्या. त्यानंतर पालखी, भैरवनाथांची व म्हस्कोबा देवांची काठी वाजत गाजत पायी माळावरील श्रीनाथ म्हस्कोबा मुख्य मंदिरात आली. मंदिरात असणारी दीपमाळ प्रज्वलित केल्यानंतर पालखी मंदिरातील कासावर थांबली. या ठिकाणी शस्त्र पूजन केले. त्यानंतर आपटा पूजन होऊन सोने लुटण्याचा कार्यक्रम झाला. त्यानंतर ‘सवई सर्जाचं चांगभलं’ ‘नाथ साहेबांचं चांगभलं’ ‘माता जोगेश्वरीच चांगभलं’चा जयघोष करीत पालखीची मंदिर प्रदर्शना होऊन मंदिरात धुपारती झाली. त्यानंतर पालखी पुन्हा देऊळ वाड्यात आली.
पालखी व दोन्ही काठ्या पुन्हा वाजत गाजत कोडीत गावाकडे आल्या. पालखी काठी बरोबर अबदागिरी, छत्र्या, चौऱ्या, डागदार, मानकरी व ग्रामस्थ यांचा सहभाग होता. गावातील नंदी चौकात महिलांनी औक्षण करून व फटाक्यांच्या आतषबाजीत पालखी काठ्याचे स्वागत केले. पालखीच्या स्वागतासाठी रस्त्यात रांगोळ्या काढण्यात आल्या होत्या. त्यानंतर पुन्हा पालखी देऊळवाडी विसावली.
PNE25V56961