इंदापूर, ता. ४ : शहरातील अंबिकानगर परिसरात अनेक वर्षांपासून रस्त्याचा प्रश्न प्रलंबित आहे. याकडे प्रशासनाचे लक्ष वेधण्यासाठी ‘रस्ता द्या नाहीतर मतदानावर बहिष्कार’ अशी आक्रमक भूमिका घेतली आहे.
याबाबत स्थानिक नागरिकांनी नगरपरिषदेचे मुख्याधिकारी रमेश ढगे यांना निवेदन दिले आहे. निवेदनानुसार, अंबिकानगर (राऊत विहीर) परिसरात जाण्यासाठी येथे २००२ मध्ये डांबरीकरण रस्ता हनुमान मंदिरापर्यंत झाला होता. परंतु, गेल्या अनेक वर्षांपासून या रस्त्याची दुरवस्था झाली आहे. त्यानंतर आता या रस्त्याच्या कामासाठी ३५ लाख रुपयांचा निधी उपलब्ध झालेला आहे. मात्र या भागातील स्थानिक एका नागरिकाच्या अडवणुकीमुळे येथील ३० ते ४० कुटुंबाच्या नियमित जाण्या-येण्याचा प्रश्न निर्माण झाला आहे. यामुळे गेली २० वर्षांपासून वापरत असलेला हा रस्ता निधी आणि वर्क ऑर्डर होऊनही मागील सहा महिन्यांपासून काम सुरू झाले नाही. यामुळे हा रस्ता लवकरात लवकर खुला करून काम चालू करावे, अशी मागणी नागरिक करत आहे.