इंदापूर, ता. २१ : सोलापूर- पुणे महामार्गावरील सरडेवाडी (ता. इंदापूर) टोलनाका परिसरात मांगुर माशाची वाहतूक करणाऱ्या वाहनावर इंदापूर पोलिसांनी कारवाई केली असून यामध्ये मांगुर मासा नष्ट करण्यात आला. याप्रकरणी कर्नाटक आणि बिहार येथील दोघांच्या विरोधात गुन्हा दाखल करण्यात आला आहे.
याबाबत राजेंद्र रूपचंद राठोड (सहा.मत्स्य व्यवसाय विकास अधिकारी रा.मत्स्यबीज केंद्र हडपसर ता.हवेली जि.पुणे) यांनी फिर्यादी दिली. त्यानुसार गुरुवारी (ता. २०) रात्री ११ वाजताच्या दरम्यान टोलनाका परिसरात एक लाल रंगाचा आयशर वाहन (क्रमांक -केए-४०-बी-४६३८) वाहनचालक मंजुनाथाचारी सिध्दाप्पाचारी (वय ४४, मुळ रा.हित्तालाहली, कर्नाटक) व नसरुद्दीन मियाँ पिता दाउदमियॉं (वय ५०, रा. हुसेपुर, बिहार) हे दोघे मांगुर या जातीच्या माशाची वाहतूक करीत असल्याचे दिसून आले. त्यांच्यावर कारवाई करीत पोलिसांनी गुन्हा दाखल केला आहे.
ही कारवाई इंदापूर पोलिस ठाण्याचे पोलिस निरीक्षक विलास नाळे यांच्या मार्गदर्शनाखाली गुन्हे शोध पथकाचे पोलिस उपनिरीक्षक अजित बिरादार, पोलिस हवालदार सलमान खान, पोलिस शिपाई लक्ष्मण सूर्यवंशी, तुषार चव्हाण, अंकुश माने, गणेश डेरे, विनोद लोखंडे, सूरज गुंजाळ, योगेश कर्चे, नंदू जाधव यांनी केली.