इंदापूर, ता. १८ : अतिशय अटीतटीच्या झालेल्या इंदापूर नगर परिषदेच्या निवडणुकीची मतमोजणी रविवार (ता. २१) होणार असून त्यासाठी प्रशासकीय यंत्रणा सज्ज झाली आहे. मतमोजणीसाठी १० टेबल असणार आहे, अशी माहिती निवडणूक निर्णयअधिकारी तथा तहसीलदार सुधाकर मागाडे व साहाय्यक निवडणूक निर्णय अधिकारी तथा मुख्याधिकारी रमेश ढगे यांनी दिली.
शहरातील कालठण रोड येथील शासकीय धान्य गोडाऊन येथे सकाळी ८ वाजता मतमोजणीसाठी नियुक्त अधिकारी/कर्मचारी यांना प्रवेश दिला जाणार असून त्यानंतर ९ वाजता सर्व अधिकारी, कर्मचारी यांना मतमोजणीबाबत सर्वसाधारण सूचना देण्यात येतील. सकाळी ९.४५ वाजता उमेदवार प्रतिनिधी यांचे उपस्थितीत स्ट्रॉगरूम उघडण्यात येईल. त्यानंतर १० पासून प्रत्यक्ष मतमोजणी सुरू करण्यात येणार आहे. या मतमोजणी प्रक्रियेकरिता सुमारे ९५ अधिकारी, कर्मचारी यांची नियुक्ती करण्यात आलेली आहे. पोस्टल मतमोजणीसाठी एका पथकाची नियुक्ती करण्यात आली आहे. तसेच यामध्ये परिचालन अधिकारी, लिखित परिगणना पथक, संगणकीय पथक, स्टेशनरी साहित्य वाटप पथक अशा विविध पथकांची नियुक्ती करण्यात आली आहे. मतमोजणी कामी नियुक्त अधिकारी व कर्मचारी यांना शनिवार (ता.२०) दुपारी ३ वाजता शासकीय धान्य गोडाऊन, इंदापूर येथे प्रशिक्षण देण्यात येणार आहे.