जेजुरी, ता. २८ ः जेजुरी औद्योगिक वसाहतीमधील पाच वर्षांपासून बंद असलेल्या कारखान्यांच्या जागा ताब्यात घेऊन गरजू व मागणी करणाऱ्या उद्योजकांना द्याव्यात. यामध्ये स्थानिक भूमिपुत्राना प्राधान्य द्यावे. ईएसआयसी हॉस्पिटलच्या सुविधा सर्वसामान्य कामगारांना मिळाव्यात. जेजुरी औद्योगिक वसाहतीमध्ये ट्रक वाहनतळ नसल्याने अनेक छोट- मोठे अपघात होतात. या दुर्घटना टाळण्यासाठी ट्रक वाहनतळ निर्माण करावे, अशा विविध अडीअडचणीचे निवारण करण्यासाठीच्या मागणीचे निवेदन जिसा संघटनेच्या वतीने उद्योग राज्यमंत्री इंद्रनील नाईक यांना देण्यात आले.
उद्योग राज्यमंत्री नाईक हे बारामतीच्या दौऱ्यावर जात असताना जेजुरी (ता. पुरंदर) येथील श्री शिवाजी इंग्लिश मिडीयम स्कूल येथे थांबले होते. यावेळी खंडोबा प्रतिमा देऊन नाईक यांना सन्मानित करण्यात आले. याप्रंसगी शिक्षण संस्थेचे उपाध्यक्ष प्रदीप पवार, मुख्याध्यापक श्रीकांत पवार, जिसा संघटनेचे अध्यक्ष संदीप जगताप, उपाध्यक्ष विकास पवार, सुरेश उबाळे, संपत कोळेकर, मयूर लाखे, दीपक कुदळे, प्रशांत गायकवाड, महेश उबाळे, राजसिंह पवार, केतन ताकवले आदींसह कामगार चळवळीतील कार्यकर्ते उपस्थित होते.
यावेळी चर्चा करताना नाईक म्हणाले की, ‘‘स्थानिक लोकप्रतिनिधींशी समन्वय साधून स्थानिक पातळीवर संयुक्तिक बैठकीचे आयोजन करून येथील अडीअडचणी सोडवल्या जातील’’