जेजुरी, ता. १५ : पुरंदर तालुक्यातील माळशिरस येथे प्रेयसीच्या पतीचा डोक्यात कोयत्याने वार करून खून करून फरार झालेल्या आरोपीला जेजुरी पोलिसांनी २४ तासांतच अटक केली. सुशांत संदीप मापारी (रा. माळशिरस), असे आरोपीचे नाव आहे.
याबाबत जेजुरी पोलिसांनी माहिती दिली की, पुरंदर तालुक्यातील राजेवाडी येथील दीपक जगताप याचा एक महिन्यापूर्वी एका महिलेशी प्रेमविवाह झाला होता. या महिलेचा पहिला प्रियकर सुशांत मापारी याने दीपक जगताप यांना मोबाइलवर फोन करून, ‘मला संबंधित महिलेबरोबर लग्न करायचे होते, पण तुम्ही दोघांनी लग्न केले.तुम्हाला जिवंत सोडणार नाही,’ अशी धमकी दिली होती. दरम्यान, १३ डिसेंबर रोजी प्रशांत याने दीपक यांना माळशिरस येथील रामकाठी शिवारात बोलावून घेतले व त्याच्या डोक्यात कोयत्याने वार करून खून करून पळून गेला. रविवारी (ता. १४) खुनाची घटना उघडकीस आली. आरोपी प्रशांत याला पकडण्यासाठी पोलिसांनी पथके पाठवली होती. सोमवारी आरोपी यवत परिसरात असल्याची गोपनीय माहिती पोलिसांना मिळाली. सहाय्यक पोलीस निरीक्षक दीपक वाकचौरे, पोलिस उपनिरीक्षक सर्जेराव पुजारी, महेश पाटील, पोलीस हवालदार अण्णा देशमुख, तात्यासाहेब खाडे, विठ्ठल कदम, दशरथ बनसोडे, संदीप भापकर, हेमंत भोंगळे, योगेश चीतारे, प्रसाद कोळेकर या पोलीस पथकाने यवत परिसरातील शेतात आरोपी सुशांत मापारी याला ताब्यात घेतले. त्याने आपण खून केल्याची कबुली पोलिसांना दिली.