जुन्नर, ता. ३१ : तालुक्यातील १८४ गावातील १२ मंडल विभागात १ ते ७ ऑगस्ट कालावधीत महसूल सप्ताहाचे आयोजन करण्यात आले आहे, अशी माहिती तहसीलदार डॉ. सुनील शेळके यांनी दिली. महसूल सप्ताहाचे प्रभावी अंमलबजावणीसाठी तालुक्यात मंडळनिहाय नोडल अधिकाऱ्यांची नियुक्ती केली आहे. महसूल सप्ताहात नागरिकांच्या विविध प्रश्नांची सोडवणूक करण्यात येणार आहे. शुक्रवारी (ता. १) महसूल दिन साजरा करण्यात येणार आहे. महसूल सप्ताहाच्या प्रारंभप्रसंगी महसूल विभागातील उत्कृष्ट अधिकारी व कर्मचारी यांना पुरस्कार देऊन सन्मानित करण्यात येणार आहे. शासकीय जागेवर २०११ पूर्वी रहिवासी अतिक्रमण नियमानुकूल करण्यास पात्र असलेल्या कुटुंबांना या जागांचे पट्टे वाटप करणे, पाणंद/शिवरस्ते मोजणी करून अतिक्रमणमुक्त करणे, त्यांच्या दुतर्फा झाडे लावणे, छत्रपती शिवाजी महाराज महाराजस्व अभियान राबविणे, विशेष साहाय्य योजनेतील डीबीटी न झालेल्या लाभार्थ्यांची घरभेटी घेऊन डीबीटी करून देणे, शासकीय जमिनीवरील अतिक्रमणे दूर करणे आदी उपक्रम राबविण्यात येणार आहेत.