जुन्नर, ता. १८ : श्रावण महिन्यातील शेवटच्या चौथ्या सोमवारी (ता. १८) जुन्नरमधील विविध शिवालयातून ‘जय भोलेनाथ,’ ‘हर हर महादेव’चा जयघोष होत होता. शिवमंदिरे दर्शनासाठी आलेल्या शिवभक्तांनी फुलून गेली होती. मंदिरांवर विद्युत रोषणाई केली होती. शिवनेरीच्या पायथ्याशी असलेले प्राचीन पंचलिंग शिवालय तसेच शहरातील विविध पेठांमधून बारापेक्षा अधिक प्राचीन शिवमंदिरे आहेत.
येथे पहाटेपासून शिवलिंगाच्या दर्शनास सुरवात झाली. शिवलिंगावर दूध, बेलाचे पान वाहण्यात येत होते. जुन्नर शहर या पुस्तकात शहरातील १२ ज्योर्तिलिंग मंदिराची माहिती फोटोंसह दिवंगत रंगनाथ वामन टण्णू गुरुजी यांनी दिली आहे. यात वैजनाथ, गिरिजेश्‍वर, सूर्यकुंडेश्‍वर, ओंकारेश्‍वर, अमृतेश्‍वर, उत्तरेश्‍वर, नागेश्‍वर, नर्मदेश्‍वर, रामेश्‍वर, काशीविश्वेश्वर, जगदीश्‍वर, पाताळेश्‍वर या मंदिराचा उल्लेख केलेला आढळून येतो.
शेवटच्या सोमवारी पंचलिंग मंदिरात तांदळाच्या पाच कलात्मक पिंडी बनविल्या होत्या. महादेवाच्या प्रतिकात्मक मुखवट्याच्या मस्तकावरील शिरेतून एका लिंबाच्या आधारावर तांदळाच्या पिंडी बनवून ठेवल्या जातात.
मंदिरातील पिंडीच्या मध्यभागातील स्वयंभू पाच पिंडीच्या दर्शनासाठी सकाळपासून रांगा लागल्या होत्या. शेवटच्या सोमवारी अमरनाथ सेवा मंडळाने आलेल्या भाविकांना दिवसभर खिचडी आणि दूध वाटप केले.