जुन्नर, ता. १७ : बिबट नसबंदी व स्थलांतर उपाय फक्त बोलण्याचे असून कधी होतील, याची शाश्वती नाही यामुळे जुन्नर वनविभागात बिबट प्रवण क्षेत्रातील शेतवस्तीवरील प्रत्येक घराला वनविभागाचे वतीने तत्काळ सौर कुंपण व प्रत्येकाला स्मार्ट स्टीक उपलब्ध करून द्यावी, अशी मागणी भारतीय किसान संघाचे प्रशांत पाबळे यांनी केली आहे. याबाबतचे निवेदन मुख्यमंत्री देवेंद्र फडणवीस यांना पाठविण्यात आले आहे.
जुन्नर वनविभागात बिबट समस्या दिवसेंदिवस गंभीर होत चालली आहे.दुचाकीवर तसेच नागरिकांवर बिबट हल्ल्याचे प्रमाण वाढले आहे. यात अनेक जण जखमी झाले आहेत. पशुधनाचे देखील मोठे नुकसान होत आहे. बिबट नसबंदी तसेच स्थलांतर हे उपाय केव्हा अमलात येणार याची कोणतीही शाश्वती नाही. त्यामुळे गावा बाहेरील सर्व घरांना तत्काळ सौर कुंपण तसेच प्रत्येकाला स्मार्ट स्टीक दिली तर बिबट हल्ला परतावून लावण्यासाठी निश्चितच उपयोग होऊ शकेल. यामुळे नागरिकांना बिबट्यापासून संरक्षण मिळण्यास मदत होणार आहे. वन विभागाने फक्त माहिती घेऊन दोन-चार महिने सौर कुंपण द्यायचं नाही असं काही करू नये.याचबरोबर कीर्तनकार, प्रवचनकार, व्याख्यानकर्ते,निवेदक यांना देखील प्रशिक्षण देऊन गावोगावी बिबट जागृतीसाठी प्रयत्न करावेत. बिबट समस्येवर मार्ग काढण्यासाठी लवकरात लवकर सौर कुंपण उपलब्ध करून देऊन बाकीचे उपाय तत्काळ सुरू करावेत, असे निवेदनात नमूद करण्यात आले आहे.