कडूस, ता. १७ ः चांडोली (ता. खेड) ग्रामीण रुग्णालयाच्या वतीने खेड तालुक्यात एचआयव्हीबाबत विशेष जनजागृती मोहीम राबविण्यात येत आहे. या मोहिमेअंतर्गत तालुक्यातील शाळा, महाविद्यालयांमधील विद्यार्थ्यांसाठी संवेदनशीलता कार्यक्रम आयोजित केले जात आहेत, अशी माहिती ग्रामीण रुग्णालयाच्या वैद्यकीय अधीक्षक डॉ. तेजश्री रानडे यांनी दिली.
महाराष्ट्र राज्य एड्स नियंत्रण सोसायटी यांच्या निर्देशानुसार व चांडोली ग्रामीण रुग्णालयाच्या आयसीटीसी विभागामार्फत तालुक्यात १४ ऑगस्टपासून या मोहिमेला सुरुवात झाली आहे. ही मोहीम ऑक्टोबर अखेरपर्यंत राबवली जाणार आहे. या मोहिमेत तालुक्यातील शाळा, महाविद्यालये व गावांमध्ये विद्यार्थ्यांसाठी संवेदनशीलता कार्यक्रम आयोजित केले जात आहेत. आतापर्यंत वाफगाव येथील श्रीमंत यशवंतराव होळकर विद्यालय, दोंदे येथील भैरवनाथ माध्यमिक विद्यालय, चांडोली येथील आर्या स्कूल, एस.एन.इंग्लिश मीडियम स्कूल, राजगुरुनगर येथील के.टी.इ.एस. इंग्लिश मीडियम स्कूल, हुतात्मा राजगुरू विद्यालय, कडूस येथील रामभाऊ म्हाळगी माध्यमिक विद्यालय, निर्मल इन्स्टिट्यूट आदी संस्थांमध्ये उपक्रम पार पडले आहेत.
रुग्णालयातील आयसीटीसी विभागातील कर्मचारी अल्ताफ पठाण, मुख्तार शेख, अप्पासाहेब खंडागळे व रवींद्र रोकडे मेहनत घेत आहेत. उपक्रमांतर्गत विद्यार्थ्यांना किशोरवयीन बदल, एचआयव्ही, लैंगिक रोगांची माहिती, प्रतिबंधात्मक उपाय व आरोग्यदायी जीवनशैलीबाबत मार्गदर्शन करण्यात येत आहे. संवादाच्या माध्यमातून तरुणांमधील जागरूकतेत वाढ करण्याचे उद्दिष्ट घेऊन हा उपक्रम राबविण्यात येत आहे.

01952