शरद पाबळे

कोरेगाव भीमा : पुणे-अहिल्यानगर हमरस्त्यावरील सुमारे ४० ते ४५ हजार लोकसंख्या असलेल्या कोरेगाव भीमा या शिरूर तालुक्यातील मोठ्या गावाला गेल्या ९ ते १० वर्षांपासून प्राथमिक आरोग्य केंद्राची प्रतीक्षा आहे. त्यामुळे येथील रुग्णांना १३ किलोमीटर अंतरावरील तळेगाव प्राथमिक आरोग्य केंद्रात उपचारासाठी जावे लागते.
कोरेगाव भीमा येथे शासनाने दोन एकर जागा आरोग्य केंद्रासाठी मंजूर केलेली आहे. मात्र, या जागेवर अतिक्रमण झाल्याने तेथे आरोग्य केंद्राची उभारणी होऊ शकलेली नाही. त्यामुळे आरोग्य केंद्राचा प्रश्न गेली नऊ ते दहा वर्षे प्रलंबित आहे. त्यामुळे कोरेगाव भीमा येथील रुग्णांची मोठी गैरसोय होत आहे. येथील रुग्णांना दूर अंतरावरील तळेगाव प्राथमिक आरोग्य केंद्रात अथवा पेरणे येथे उपचारासाठी जावे लागते. दरम्यान, येथील लसीकरण व अन्य उपचारासाठी गरजेनुसार शिक्रापूर उपकेंद्रातून येथे आरोग्य सेवा दिली जात असल्याचे तळेगाव प्राथमिक आरोग्य केंद्राच्या वैद्यकीय अधिकारी डॉ. संध्या कारंडे यांनी सांगितले. मात्र, कोरेगाव भीमा येथे स्वतंत्र आरोग्य केंद्रच नसल्याने शाळेतील एका खोलीतच आरोग्य केंद्राचे साहित्य ठेवण्यात आले असून पुरेशी जागा, कर्मचारी व औषधांअभावी येथील नागरिकांना शासकीय वैद्यकीय सेवा मिळत नसल्याने अनेक रुग्णांना उपचार तसेच लसीकरणासाठी खासगी डॉक्टरांकडे जावे लागते.

कोरेगाव भीमा गावची २०११च्या जनगणनेनुसार १३ हजार २०० असलेली लोकसंख्या सध्या सुमारे ४० हजारांच्याही पुढे गेलेली आहे. त्यामुळे येथे आरोग्य केंद्राची नितांत गरज आहे. त्यासाठी प्रशासनाकडे सातत्याने पाठपुरावा सुरू असून लवकरच प्राथमिक आरोग्य केंद्राच्या जागेचा व बांधकामासाठी निधीचाही प्रश्न मार्गी लागून कोरेगाव भीमा व परिसरासाठी स्वतंत्र प्राथमिक आरोग्य केंद्र सुरू होईल.
-संदीप ढेरंगे, सरपंच, कोरेगाव भीमा, ता. शिरूर