केडगाव, ता. २७ : पुणे-चेन्नई रेल्वेमार्गावरील महत्त्वाच्या दौंड जंक्शन स्थानकाच्या सुविधांमध्ये वाढ करण्यासाठी मुख्यमंत्री देवेंद्र फडणवीस यांनी केंद्रीय रेल्वेमंत्री अश्‍विनी वैष्णव यांना पत्र लिहून महत्त्वाच्या मागण्या केल्या आहेत. अशी माहिती आमदार राहुल कुल यांनी पाटस येथे पत्रकारांना दिली.
आमदार कुल यांनी रेल्वेच्या मागण्या मुख्यमंत्री फडणवीस यांच्याकडे निवेदनाद्वारे केल्या होत्या, त्यानंतर मुख्यमंत्र्यांनी रेल्वेमंत्र्यांना पत्र देऊन या मागण्या केल्या आहे. मुख्यमंत्र्यांनी दिलेल्या निवेदनात दौंड स्थानकाला उपनगरीय स्थानक घोषित करावे, दौंड–पुणे/तळेगाव दरम्यान लोकल सेवा सुरू करावी, डेमू रेल्वेच्या फेऱ्या वाढवणे, मुंबई–सोलापूर वंदे भारत एक्सप्रेसला दौंड येथे थांबा देणे. दौंड येथे इलेक्ट्रिक लोकोमोटिव्ह शेडचे बांधकाम जलदगतीने पूर्ण करणे. दौंड स्थानकावर प्रवाशांच्या सोयीसाठी एस्केलेटर बसवणे. पाटस स्थानकावर पादचारी पुलाचे बांधकाम केल्यास प्रवाशांना प्रवेश अधिक सुलभ होईल, अशा मागण्या आहेत.
या मागण्या पुणे जिल्ह्याचे आमदार राहुल कुल यांनी प्रवाशांच्या हितासाठी पुढे आणल्या असून, दौंडजवळील नागरिकांना यामुळे मोठा दिलासा मिळणार आहे, असे मुख्यमंत्र्यांनी पत्रात नमूद केले आहे. मुख्यमंत्री फडणवीस यांनी रेल्वे बोर्डाला या मागण्यांचा सकारात्मक विचार करून त्वरित अंमलबजावणी करावी, अशी विनंती केली आहे.