निमगाव केतकी, ता. २९ : ‘‘पर्यटकांना व वन्यजीव अभ्यासकांना माळरानावरची जैवविविधता पाहता यावी, तिचा अभ्यास करता यावा यासाठी कडबनवाडी येथे राज्यातील सुरू केलेल्या पहिल्या गवतकुरण (ग्रासलँड) सफारीच्या माध्यमातून हे गाव आता देश विदेशापर्यंत पोहोले आहे. याचा इंदापूर तालुक्याचा लोकप्रतिनिधी या नात्याने आनंद होत आहे,’’ असे प्रतिपादन क्रीडा तसेच वृक्ष लागवडमंत्री दत्तात्रेय भरणे यांनी केले.

कडबनवाडी (ता. इंदापूर) येथे शनिवारी (ता.२८) महाराष्ट्र शासन वनविभाग पुणे यांच्यावतीने गवताळ प्रदेश मध्ये जिप्सीमधून सफारी या कार्यक्रमाचे उद्‌घाटन भरणे यांच्या हस्ते करण्यात आले. यावेळी ते म्हणाले की, वनराज्यमंत्री असताना या ठिकाणी येथे अनेक सुधारणा केल्या आहेत. भविष्यात देखील या ठिकाणाला मोठे महत्त्व प्राप्त होणार आहे.
वनसंरक्षक आशिष ठाकरे म्हणाले, येथील प्राण्यांचा अधिवास सुरक्षित ठेवत या ठिकाणी ग्रासलँड सफारी बरोबर ॲग्रीटुरिझमला देखील भविष्यात चांगली संधी आहे.

सहाय्यक वनरक्षक मंगेश ताटे म्हणाले, गवतकुरण सफारीच्या माध्यमातून येथे दीड वर्षात वेबसाईटवर ऑनलाइन बुकिंग करून तेरा हजार देश देश विदेशातील पर्यटकांनी भेटी दिल्या आहेत. यातून ४९ लाख रुपयांचे उत्पन्न मिळाले आहे.आतापर्यंत पर्यटक त्यांच्या गाडीतून सफारी करत होते. आता यापुढे येथील उघड्या जिप्सीमधून सफारी करता येईल.

वन व वन्यजीव संस्थेचे अध्यक्ष भजनदास पवार यांनी याबाबत ऑक्सिजन पार्कच्या माध्यमातून केलेल्या वृक्षारोपणाची माहिती दिली.फ्रेंड्स ऑफ नेचर क्लबचे सदस्य ॲड.सचिन राऊत यांनी येथे वन्य प्राण्यांच्या अधिवासास धोका पोहोचू नये याकरिता पर्यटकांनी दुर्बनीचा जास्त वापर करावा, अशी सूचना दिली.

उद्‌घाटनप्रसंगी पुणे विभागाचे मुख्य वनसंरक्षक आशिष ठाकरे, उपवनसंरक्षक महादेव मोहिते, सहाय्यक वनरक्षक मंगेश ताटे, तात्कालिक वनपरिक्षेत्राधिकारी अजित सूर्यवंशी, कडबनवाडीचे सरपंच दादासाहेब जाधव, उपसरपंच संगीता गावडे, माऊली चवरे, राहुल जाधव, श्रीमंत ढोले, अमर बोराटे, छगन शिंगाडे, मोहन खराडे, दीपक डोंबाळे, सयाजी येवले हे उपस्थित होते.
इंदापूरच्या वनपरिक्षेत्र अधिकारी भाग्यश्री ठाकूर यांनी उपस्थितांचे स्वागत केले.

02765