निमगाव केतकी, ता. ८ : निमगाव केतकी (ता. इंदापूर) येथील हिंदू- मुस्लिम ऐक्याचे प्रतीक अशी ओळख असलेल्या केतकेश्वर गणेश मंडळाची विसर्जन मिरवणूक लक्षवेधी ठरली. पारंपारिक वाद्य, गुलालाऐवजी फुलांची उधळण, पद्मावती मंदिराची प्रतिकृती व आकर्षक विद्युत रोषणाई, बहुरूपी बाहुल्यांचे नृत्य व महिलांसह मुस्लिम बांधवांच्या सहभागात काढलेल्या मिरवणुकीचे ग्रामस्थांनी कौतुक केले.
शुक्रवारी (ता. ५) नवी पेठ गणेश मंडळ, विघ्नहर्ता गणेश मंडळ, छत्रपती गणेश मंडळ व फुटाणे नगर महाराजा गणेश मंडळ या मंडळांनी पारंपारिक वाद्याच्या गजरामध्ये गणपतीचे विसर्जन केले. केतकेश्वर मंडळाने विसर्जन मिरवणुकीदरम्यान फिरती स्क्रीन व चार सीसीटीव्ही लावून त्याचे प्रक्षेपण केले. कर्नाटक सारवाडमधील बहुरूपी बाहुल्यांचे नृत्य खास आकर्षण ठरले. मंडळाच्या पदाधिकारी व कार्यकर्त्यांनी मिरवणुकीचे नियोजन केले होते.