निमगाव केतकी, ता. १९ : ‘‘शासनाला अभिप्रेत असलेला विकास व सुविधा खऱ्या अर्थाने शेळगाव ग्रामपंचायतीने गावात लोकांच्या सहभागातून नावीन्यपूर्ण उपक्रम राबवून केला. तो राज्याला दिशादर्शक ठरेल,’’ असा विश्‍वास इंदापूरचे गटविकास अधिकारी सचिन खुडे यांनी व्यक्त केला.
बुधवारी (ता. १७) खुडे यांच्या अध्यक्षतेखाली मुख्यमंत्री समृद्ध पंचायत राज अभियानांतर्गत विशेष ग्रामसभा पार पडली. यावेळी पुणे जिल्हा परिषदेचे पाणीपुरवठा व स्वच्छता अभियानाचे उपमुख्य कार्यकारी अधिकारी अप्पासाहेब गुजर, सरपंच ऊर्मिला शिंगाडे यांची प्रमुख उपस्थिती होती.
यावेळी ग्रामपंचायत अधिकारी चंद्रकांत जगताप यांनी गावात झालेल्या कामांचा आढावा सांगितला. ग्रामसभेत सर्वानुमते प्लॅस्टिकबंदीचा तसेच वीस लाख लोक वर्गणी करून त्यामधून गावातील आठ जिल्हा परिषद शाळा डिजिटल करणे तसेच १७ सप्टेंबर ते ३१ डिसेंबर या कालावधीत ग्रामपंचायत कर १००% भरणाऱ्यांसाठी लकी ड्रॉ मधून इलेक्ट्रिक स्कूटी व इतर दहा बक्षिसे ठेवण्याचा ठराव यावेळी केला.
छत्रपती कारखान्याचे माजी संचालक ॲड. लक्ष्मणराव शिंगाडे यांनी गावात होत असलेल्या भरीव विकास कामाबाबत समाधान व्यक्त केले. पाणंद रस्त्यासह अन्य विषय यावेळी ग्रामस्थांनी मांडले.
शेळगावचे ग्राम महसूल अधिकारी गजानन चव्हाण यांच्यासह उपसरपंच, सदस्य, विविध पक्षाचे पदाधिकारी व ग्रामस्थ मोठ्या संख्येने उपस्थित होते.