निमगाव केतकी, ता. ११ : निमगाव केतकी- लोणी (ता. इंदापूर) या रस्त्यावर भरधाव वाहनाच्या धडकेत कौठळी हद्दीत गुरुवारी (ता. ११) चिंकारा जातीच्या हरणाचा जागीच मृत्यू झाला.
सततच्या अपघातामुळे इंदापूर तालुक्यातील चिंकाराच्या सुरक्षेचा प्रश्न ऐरणीवर आला आहे. वारंवार होणाऱ्या चिंकारासह अन्य वन्य प्राण्यांच्या अपघाताबाबत वनविभाग ठोस उपाययोजना कधी राबवणार? असा सवाल वन्यजीव प्रेमींकडून विचारला जात आहे.
गुरुवारी सकाळी नऊच्या सुमारास रस्ता ओलांडणाऱ्या चिंकारा हरणास वाहनाची धडक बसल्यानंतर ते जखमी झाले. रस्त्यावरून जाणाऱ्या निखिल शेंडे यांनी याबाबत फ्रेंड्स ऑफ नेचर क्लबचे सदस्य ॲड. सचिन राऊत यांना मोबाईलद्वारे कळविल्यानंतर राऊत यांनी वनविभागाच्या अधिकाऱ्यांना सांगितले. त्यानंतर वनरक्षक मिलिंद शिंदे तातडीने घटनास्थळी आले. यावेळी या ठिकाणी राऊत यांच्यासह वनमजूर अप्पा देवकाते, राजेंद्र काळे, बाळू राऊत उपस्थित होते.
याबाबत वनरक्षक शिंदे म्हणाले, ‘‘अपघातात चिंकाराच्या शिंगाला, तसेच तोंडाला जास्त मार लागल्यामुळे त्याचा मृत्यू झाला आहे. मृत्यू झालेला चिंकारा नर जातीचा एक वर्ष वय असलेला होता.’’

उपाययोजना करण्याची मागणी
इंदापूर तालुक्यामध्ये मोठ्या प्रमाणात वनक्षेत्र असून, या क्षेत्रामध्ये चिंकारासह विविध प्राणी मोठ्या संख्येने आहेत. अनेक ठिकाणी वनीकरणांमधून रस्ते गेलेले आहेत. प्राण्यांचे मोठ्या आकाराचे फलक, वाहनांची वेगमर्यादा, सीसीटीव्ही कॅमेरे, जनजागृती, जाळपट्टे यासह अन्य उपाययोजना करणे गरजेचे असल्याचे मत वन्यप्रेमींकडून व्यक्त केले जात आहे.