कोळवण, ता. २६ : पाण्याखाली भात रोपे गेल्याने आता पुनर्लागवड शक्य नाही. पंतप्रधान पीक विमा योजना भातासाठी अजून चालू झाली नाही. ती एक जुलैपासून चालू होईल, परंतु रोपांचे नुकसान जून महिन्यातील तिसऱ्या आठवड्यात झाले आहे. त्यामुळे पंतप्रधान पीक विमा योजना लागू करावी. त्यातील निकषाप्रमाणे नुकसान भरपाई द्यावी. पुनर्लागवडीसाठी भात रोपे उपलब्ध करून द्यावीत. नाहीतर शासनाने ओला दुष्काळ जाहीर करावा, अशी मागणी विविध शेतकऱ्यांसह चिखलगाव (ता.मुळशी) येथील शेतकरी लहू मारुती फाले यांनी केली आहे.

भोर, राजगड तसेच मुळशी तालुक्यात मागील आठवड्यापासून मुसळधार पाऊस सुरू आहे. या तालुक्यात भात हेच प्रमुख पीक आहे. सततच्या पावसामुळे भात रोपे पाण्याखाली गेली आहेत. त्यांची मुळे कुजली आहेत. काही भात बियाणे पावसामुळे शेतातून वाहून गेले. तर काही काही भात रोपांवर गाळाचा थर साचला आहे. परिस्थितीत मतदारसंघातील भात रोपांची पुनर्लागवड कशी करावी?असा प्रश्न शेतकऱ्यांसमोर उभा आहे. निसर्गाने उत्पन्नाचे मुख्य स्रोत हिरावून घेतल्याने वर्षभराचे आर्थिक गणित बिघडले आहे. यामुळे शेतकऱ्यांवर मोठे संकट कोसळले आहे.

भात रोपांचे त्वरित पंचनामे करण्याचे आदेश संबंधित विभागाने द्यावेत म्हणून कृषी आयुक्त सूरज मांढरे यांना आमदार मांडेकर यांनी पत्र दिले आहे. यावेळेस आमदार मांडेकर यांचे स्वीय सहायक शहाजी पवार, ज्ञानेश्वर डफळ, लहू फाले, चेतन फाले, विजय साठे, संतोष साठे, नामदेव खिलारी, समीर दुडे, ईश्वर घायतडकर, अतुल फाले हे शेतकरी उपस्थित होते.

शेतकऱ्यांनी खायचे काय?
भात रोपे पाण्याखाली गेल्याने शेतकऱ्यांचे वर्षभराचे आर्थिक गणित बिघडेल. भाताची लागवड झालीच नाही तर शेतकऱ्यांनी खायचे काय? अशी गंभीर समस्या निर्माण झाली आहे यामधून शेतकऱ्यांना दिलासा मिळणे आवश्यक आहे. तरी नुकसान झालेल्या शेतकऱ्यांच्या भात रोपांचे पंचनामे करून शासनाने आर्थिक मदत करण्याबाबत कार्यवाही करावी, अशी मागणी पत्राद्वारे आमदार शंकर मांडेकर यांनी केली आहे.

भोर, राजगड, मुळशी तालुक्यातील शेतकऱ्यांसह आमदार मांडेकर यांचे भात पिकाच्या नुकसानीबाबतच पत्र मिळाले. त्यामधील मागणीनुसार जिल्हा कृषी अधीक्षक यांना कळवून पुढील कार्यवाहीसाठी सूचना देणार आहे.
- सूरज मांढरे, कृषी आयुक्त