शिक्रापूर, ता.१८ : येथील (ता. शिरूर) येथील द्वारकानगरमध्ये शुक्रवारी (ता.१५) साडेपाच ते सहा फुटांचा गुलाबी डोळ्यांचा नागसदृष्य साप आढळला. यावेळी येथील रहिवासी आचंबित झाले. दिसायला अत्यंत सुंदर मात्र तितकाच विखारी फुकार टाकत चाललेल्या या सापाने पाहणाऱ्यांची तारांबळ उडविली. तो दुर्मीळ पिवळ्या रंगाचा अल्बिनो गवत्या साप असल्याचे सर्पमित्रांमुळे निष्पन्न झाले.

सर्पमित्र अमोल कुसाळकर व अमोल डाडर तातडीने घटनास्थळी पोचले आणि नियमित आढळणारा गवत्या साप असल्याचे निष्पन्न झाले. सापाच्या त्वचेतील रंगद्रव्यांची अनियमितता झाल्याने त्याच्यातील हे सर्व बदल त्याचे वेगळेपण दाखवून गेल्याचे कुसाळकर यांनी सांगितले.
स्थानिकांनी दिलेल्या माहितीनुसार शुक्रवारी (ता.१५) रोजी येथील द्वारकानगर येथील समीर पठाण यांच्या घराबाहेर एक साप रस्त्याच्या कडेने चाललेला त्यांना आढळला. पिवळा साप, त्याचे जोरकस फुत्कार, पाणीदार आणि गुलाबी डोळे यामुळे या सापाचे सौंदर्य आणखी खुलून दिसत असले तरी त्याचा फुत्कार पाहता तो प्रचंड विखारी असल्याची चर्चा सुरू झाली. पठाण यांनी येथील सर्पमित्र अमोल कुसाळकर यांना फोन करून बोलावून घेतले व सापाला तत्काळ पकडले. त्यांनी उपस्थितांना या सापाची माहिती देत सर्वांच्या शंकाकुशंकाही दूर केल्या.
यावेळी कुसाळकर यांनी सांगितले की, माहितीप्रमाणे, आपल्या भागात नियमित आढळणारा हा गवत्या साप असून तो बिनविषारी आहे. त्याच्या रंग, डोळे यामुळे तो वेगळा दिसत असला तरी त्याच्या त्वचेतील रंगद्रव्यांची अनियमित रचना शरीतात विकसीत झाल्याने त्याच्या त्वचेच्या व डोळ्यांच्या रंगात बदल झाला असून तो भुकेला असल्याने आणि घाबरल्यानेही त्याने फुत्कार सोडल्याची माहितीही त्यांनी यावेळी दिली.
दरम्यान, शिरूर वन विभागाचे नियतक्षेत्र अधिकारी प्रमोद पाटील यांच्या उपस्थितीतसापाला निसर्गाच्या सानिध्यात मुक्त करण्यात आले.

04928