काटेवाडी, ता. २६ : काटेवाडी (ता. बारामती) येथे शुक्रवारी (ता. २७) दुपारी तीनच्या सुमारास संत तुकाराम महाराज पालखी सोहळ्यात होणाऱ्या मेंढ्यांच्या रिंगण सोहळ्याच्या तयारीची राज्यसभेच्या खासदार सुनेत्रा पवार यांनी गुरुवारी (ता. २६) पाहणी केली.
येथील मेंढ्यांचा वैशिष्ट्यपूर्ण रिंगण सोहळा पाहण्यासाठी आबालवृद्धांसह वारकरी मोठ्या संख्येने सहभागी होतात. सुनेत्रा पवार यांनी तयारीचा आढावा घेतला. त्यांनी पाणीपुरवठा, स्वच्छता, आरोग्य सुविधा आणि रिंगण स्थळावरील मंडप उभारणीची पाहणी केली. ग्रामपंचायत प्रशासनाने स्वागत कमानी, आरोग्य कक्ष, हिरकणी कक्ष सर्व व्यवस्था चोख ठेवली आहे. परिसरातील विहिरींचे शुद्धीकरण आणि प्राथमिक आरोग्य केंद्रामार्फत आरोग्यविषयक उपाययोजनाही केल्या आहेत. सुनेत्रा पवार यांनी ग्रामपंचायत पदाधिकाऱ्यांशी चर्चा करून आवश्यक सूचना दिल्या आणि या सोहळ्यासाठी लाखो वैष्णवांचा मेळावा यशस्वीपणे पार पडावा, यासाठी शुभेच्छा दिल्या.