काटेवाडी, ता. ३१ : जिल्ह्यातील शेतकऱ्यांसाठी खरीप हंगाम २०२५ साठी ई-पीक पाहणी एक ऑगस्टपासून सुरू होत आहे. या उपक्रमाद्वारे शेतकरी आपल्या शेतातील पिकांची नोंद सातबारा उताऱ्यावर स्वतः करू शकतात. ही प्रक्रिया संगणकीय पद्धतीने पारदर्शक आणि जलद आहे, ज्यामुळे शेतकऱ्यांना पीक विमा, नुकसान भरपाई आणि शासकीय योजनांचा लाभ घेण्यास मदत होईल.

ई-पीक पाहणी हा महाराष्ट्र शासनाचा एक महत्त्वाचा उपक्रम आहे, ज्यामुळे शेतकऱ्यांना त्यांच्या शेतातील पिकांची अचूक माहिती सातबारा उताऱ्यावर नोंदवता येते. ही नोंदणी केल्याने शेतकऱ्यांना खालील फायदे मिळतात.
प्रधानमंत्री पीक विमा योजनेचा लाभ: नैसर्गिक आपत्तीमुळे पिकांचे नुकसान झाल्यास विम्याची भरपाई मिळते.
नुकसान भरपाई: पूर, दुष्काळ यांसारख्या आपत्तींमुळे नुकसान झाल्यास शासकीय मदत मिळण्यासाठी ई-पीक पाहणी अनिवार्य आहे.
किमान आधारभूत किंमत: पिकांची हमीभावाने विक्री करण्यासाठी नोंदणी आवश्यक आहे.
पीक कर्ज सुविधा: बँकांकडून पीक कर्ज मिळवण्यासाठी सातबारा उताऱ्यावरील नोंद उपयुक्त ठरते.
शासकीय योजना आणि अनुदान: अॅग्रीस्ट्रॅक अंतर्गत विविध योजनांचा लाभ घेण्यासाठी पिकांची नोंद आवश्यक आहे.

अशी करा ई-पीक पाहणी
१. ई-पीक पाहणी (डीसीएस) ॲप गुगल प्ले स्टोअरवरून डाउनलोड करा (संस्करण ३.०.१).
२. मोबाईल क्रमांक टाकून ओटीपी द्वारे नोंदणी करा.
३. विभाग, जिल्हा, तालुका, गाव, खाते/गट क्रमांक टाकून जमिनीचा तपशील निवडा.
४. मुख्य आणि दुय्यम पिकांचे नाव, क्षेत्र, जलसिंचन पद्धत, लागवड तारीख भरा.
५. जीपीएस प्रणाली चालू ठेवून शेतातील दोन छायाचित्रे काढा (५० मीटर आत).
६. माहिती तपासून ‘सबमिट’ करा; नेटवर्क नसल्यास नंतर ‘अपलोड’ करा.
७. ४८ तासांत माहिती दुरुस्त किंवा हटवता येते.

ॲप कोणता वापरायचा
महाराष्ट्र शासनाने विकसित केलेले ‘ई-पीक पाहणी (डीसीएस)’ ॲप गुगल प्ले स्टोअरवर उपलब्ध आहे. हे ॲप टाटा ट्रस्ट आणि महाराष्ट्र शासनाच्या सामंजस्य करारान्वये तयार झाले आहे. शेतकऱ्यांनी जुने ॲप काढून नवीन डीसीएस ॲप वापरावे.

ई- पीक पाहणीस सुरुवात झाली आहे शेतकऱ्यांनी तातडीने आपल्या पिकांची नोंदणी करून घ्यावी. न केल्यास सातबारा कोरा राहील, ज्यामुळे शासकीय योजनांचा लाभ मिळणे कठीण होईल.
- प्रसाद काळे, तलाठी काटेवाडी