काटेवाडी, ता. १३ : ई-पॉस मशिनवरील साठा व गोदामावरील साठा यामध्ये तफावत येऊन देऊ नका. तसेच इतर खतांचे लिंकिंग व जादा दराने खत विक्री देखील होऊन देऊ नये. बारामती तालुक्यात ९३०.३५ टन युरियाचा साठा होता. तर येत्या दोन दिवसात २५०० टन युरिया येणार आहे, माहिती तालुका कृषी अधिकारी सचिन हाके यांनी दिली.

तालुका कृषी अधिकारी कार्यालयात सोमवारी (ता.११) बारामती तालुक्यातील सर्व खत, बियाणे व कीटकनाशके निविष्ठा विक्रेते यांची कार्यशाळा पार पडली. यावेळी हाके बोलत होते. यावेळी युरिया विक्री नियोजनमधील ई -पॉस मशिनवरील साठा व गोदामामधील साठा यामध्ये तफावत आढळून येणार नाही. याबद्दल महत्त्वाचे सूचना दिल्या. तक्रार प्राप्त झाल्यावर संबंधित विक्रेत्या वर योग्य ती कार्यवाही प्रस्तावित केली जाईल, असा इशारा देखील तालुका कृषी अधिकारी हाके यांनी यावेळी दिला. तसेच विक्री करताना योग्य बिल देणे, शेतकऱ्यांना योग्य मार्गदर्शन करणे असे यावेळी तालुका गुणनियंत्रक महेश शिंदे यांनी सांगितले.या कार्यशाळेस बारामती ॲग्रो डीलर असोसिएशनचे अध्यक्ष बापूसाहेब मालवदकर व बारामती पंचक्रोशीतील सर्व विक्रेते मोठया प्रमाणावर उपस्थित होते.