काटेवाडी, ता. १४ ः खरीप हंगाम २०२५- २६ साठी ई- पीक पाहणी नोंदणी प्रक्रियेत सर्व्हरवर येणाऱ्या तांत्रिक अडचणींमुळे शेतकऱ्यांना अडथळ्यांचा सामना करावा लागत आहे. यावर उपाय म्हणून महसूल विभागाने शेतकऱ्यांना सकाळी ऑफलाइन पद्धतीने पीक पाहणी करून रात्री चांगल्या नेटवर्कवेळी नोंदणी पूर्ण करण्याचे आणि डेटा अपलोड करण्याचे आवाहन केले आहे.
महाराष्ट्र शासनाच्या महसूल विभागाने खरीप हंगाम २०२५- २६ साठी ‘ई- पीक पाहणी’ कार्यक्रम १ ऑगस्टपासून सुरू केला आहे. शेतकऱ्यांना ‘डीसीएस ई-पीक पाहणी’ (व्हर्जन ४.०.०) या मोबाईल अॅपद्वारे पीक नोंदणी करावी लागणार आहे. मात्र, सर्व्हरवर येणाऱ्या अतिरिक्त ताणामुळे नोंदणी प्रक्रियेस जास्त वेळ लागत आहे. यामुळे काही शेतकऱ्यांना अॅप नीट काम करत नसल्याचा भ्रम होत आहे. रात्री गावात किंवा शहरात चांगल्या इंटरनेटच्या वेळी नोंदणी पूर्ण करावी. सकाळी शेतात जाऊन ऑफलाइन पद्धतीने पीक पाहणी करावी आणि रात्री पुन्हा चांगल्या नेटवर्कमध्ये अॅपमधील ‘अपलोड’ बटण दाबून डेटा सेव्ह करावा.

ई-पीक पाहणीचे फायदे
पीक कर्ज आणि विमा मिळणे सोपे होते.
नुकसान भरपाई आणि शासकीय योजनांचा लाभ मिळतो.
अक्षांश-रेखांश तंत्रज्ञानाद्वारे पिकांची अचूक नोंद.

नोंदणीसाठी सूचना
रात्री चांगल्या नेटवर्कवेळी नोंदणी पूर्ण करा.
सकाळी ऑफलाइन पद्धतीने शेतात पीक पाहणी करा.
रात्री अॅपमधील ‘अपलोड’ बटण दाबून डेटा सेव्ह करा.

नोंदणीची अंतिम मुदत १४ सप्टेंबरपर्यंत आहे. तांत्रिक अडचणींसाठी ०२०२५७१२७१२ या हेल्पलाइनवर संपर्क साधता येईल. तसेच, ऑफलाइन नोंदी घेऊन नेटवर्क असलेल्या ठिकाणी ही माहिती अपलोड केली तरी चालते.
- गणेश शिंदे, तहसीलदार बारामती