काटेवाडी, ता. २८ : उपमुख्यमंत्री अजित पवार यांनी बारामती कृषी उत्पन्न बाजार समितीच्या वार्षिक सभेत रविवारी (ता. २८) गैरप्रकारांवर कठोर कारवाईचा इशारा दिला. बाजार समितीत गैरप्रकार करणाऱ्यांना जेलमध्ये टाकू, मी पद देतो तसेच काढूही शकतो, असे ते यावेळी म्हणाले.
या सभेत अजित पवार बाजार समितीच्या पेट्रोल पंपाच्या दीड कोटी रुपयांच्या उधारीवर भडकले. बाजार समिती प्रशासनाला उद्देशून ते म्हणाले, ‘‘उधारी वसूल करण्यासाठी डीवायएसपींना फोन करून सांगा, नाहीतर वेगळ्या पद्धतीने भरणा करावा लागेल. समितीला १४९ कोटी रुपयांचा निधी दिला असून, वार्षिक उत्पन्न फक्त एक कोटी आहे. दीडशे कोटींचे काम करायला दीडशे वर्षे लागतील का? लाज काही आहे का?’
दरम्यान, एक तक्रारीचे पत्र आल्यानंतर पवार भडकले. ते म्हणाले, ‘हे पत्र सहाय्यकाकडे ठेव, पाच तारखेला यांना बोलवा. मी करोडो रुपयांचा निधी आणतो आणि तुम्ही असं करताय?’ बाजारात चोरी होत असल्याबद्दल ते म्हणाले, ‘त्यांची माहिती द्या. मी पोलिसांना सांगतो टायरमध्ये घेण्यासाठी. काम व्यवस्थित करा, अन्यथा केस दाखल करायला लावेन. मी हयगय करणार नाही.’’
बाजार समितीच्या आवारात नशा करणाऱ्या आणि धारदार शस्त्र घेऊन बसणाऱ्यांवर कारवाई करण्याचे निर्देश अजित पवार यांनी पोलिसांना दिले.