काटेवाडी, ता. १५ ः महाराष्ट्रातील ग्राम रोजगार सहाय्यकांनी मनरेगा योजनेअंतर्गत मंजूर आठ हजार रुपये मासिक मानधनाची अंमलबजावणी न झाल्याने संप पुकारला आहे. या संपामध्ये बारामती तालुक्यातील ग्राम रोजगार सहाय्यकांनी सहभाग घेतला आहे. ग्राम रोजगार सहाय्यक संघटनेने हक्काच्या मागण्यांसाठी हे आंदोलन सुरू केले असून, पॅनल तांत्रिक अधिकारी संघटनेनेही याला पाठिंबा दर्शवला आहे. मनरेगा योजनेच्या यशात ग्राम रोजगार सहाय्यकांचा मोलाचा वाटा आहे. गावपातळीवरील सर्व कामे हाताळणाऱ्या या सहाय्यकांना पूर्णवेळ काम करावे लागते. माजी मुख्यमंत्री एकनाथ शिंदे यांच्या कार्यकाळात मासिक आठ हजार रुपये मानधनाचा शासन निर्णय घेण्यात आला होता. मात्र, त्याची अंमलबजावणी अद्याप झालेली नाही. यासोबतच मानधन थेट बँक खात्यात जमा करण्याची मागणीही सहाय्यकांनी रोहयो विभाग, मंत्रालयाकडे निवेदनाद्वारे केली आहे. शासनाने त्वरित निर्णय घ्यावा, अन्यथा आंदोलन तीव्र करण्याचा इशारा संघटनेने दिला आहे.