खुटबाव, ता. ५ : खोर (ता. दौंड) येथील ग्रामस्थ पूरग्रस्तांना मदत करण्यासाठी एकवटले आहेत. अवघ्या दोन दिवसात ग्रामस्थांनी स्वेच्छेने १० टन धान्य जमा केले आहे. जमा झालेले धान्य डोंगरकन्ही (ता. पाटोदा, जि. बीड) या गावातील पूरग्रस्तांना वाटले जाणार आहे.
गावातील एका युवकाने पूरग्रस्तांसाठी काहीतरी केले पाहिजे अशी संकल्पना मांडली. दोनच दिवसांत या संकल्पनेला मूर्त स्वरूप आले. प्रत्येक कुटुंबाने ऐपतीनुसार बाजरी, गहू ,तांदूळ व ज्वारी जमा केली. या जमा झालेल्या धान्यातून प्रत्येकी २० किलोचे ५०० किट बनवण्यात आले. जमा झालेले धान्य गावाच्या वेशीजवळ एकत्र केले. सर्व ग्रामस्थांच्या उपस्थितीत धान्याने भरलेला टेम्पो शुक्रवारी (ता. ३) पूरग्रस्त गावाकडे रवाना झाला. याचबरोबर ग्रामस्थांनी ३६ बिस्किटांचे बॉक्सही जमा केले आहेत. गावातील १५ ग्रामस्थ स्वतः डोंगरकन्ही गावामध्ये या धान्याचे वाटप करणार आहेत.

ऋणाची उतराई करणार
एकेकाळी दौंड तालुक्यातील सर्वात दुष्काळी गाव म्हणून खोर गाव प्रसिद्ध होते. गेली काही दिवसांपासून खोरची ओळख बागायती गाव म्हणून पुढे येऊ लागली. दुष्काळी गाव असल्याने अनेकदा खोर गावाला बाहेरगावावरून मदत यायची. याची उतराई म्हणून पुढील काळामध्ये प्रत्येक सामाजिक उपक्रमांमध्ये आम्ही सहभागी होणार असल्याचे, प्रतिपादन एका ज्येष्ठ ग्रामस्थाने केले.

02966