खुटबाव, ता. २६ : पारगाव (ता. दौंड) येथील रेणुका देवी दूध संस्थेच्या वतीने सभासदांना प्रतिलिटर तीन रुपये दराने १२ लाख रुपये लाभांश वाटप करण्यात आले. यामध्ये संस्थेच्या वतीने दोन रुपये व दूध संघाच्या वतीने एक रुपया लाभांशाचा समावेश आहे. वर्षभरात संस्थेचे वतीने एकूण चार लाख लिटर दूध संकलन करण्यात आले.
यात्रेच्या वेळी ठेवीच्या पैशातून प्रतिलिटर एक रुपया व संघाच्या वतीने प्रतिलिटर एक रुपया लाभांश वाटप करण्यात येणार आहे. सभासदांना मिठाईचे वाटप करण्यात आले. सह्याद्री पतसंस्थेच्या वतीने सात टक्के दराने दोन लाख रुपये लाभांश वाटप करण्यात आले. तसेच दोन्ही संस्थांच्या सर्व कामगारांना एका महिन्याचे वेतन दीपावली निमित्त देण्यात आले. संस्थेचे संस्थापक अध्यक्ष पोपटराव ताकवणे म्हणाले की, सभासदांच्या विश्वासातून रेणुका देवी दूध संस्था, सह्याद्री पतसंस्था व रामकृष्ण सोसायटी या संस्थांना चालू वर्षी नफा झाला आहे. भविष्यात संस्थेच्या वतीने अधिकाधिक सुविधा देण्यासाठी कटिबद्ध आहोत. यावेळी पारगाव सोसायटीचे अध्यक्ष मच्छिंद्र ताकवणे, यावेळी अनिल रणदिवे, किसन जगदाळे, दत्तात्रेय ताकवणे, प्रमोद ताकवणे, ज्ञानेश्वर भोगावडे, तात्या पोमण, संदीप कोरेकर आदी मान्यवर उपस्थित होते.

03024