खुटबाव, ता. १७ : पुणे जिल्ह्यातील दौंड, बारामती व पुरंदर तालुक्यातील दुष्काळी भागासाठी जीवन वाहिनी ठरणारी जनाई- शिरसाई उपसा सिंचन योजनेच्या कालव्यांना बंदिस्त नलिका वितरण प्रणालीमध्ये रूपांतरण करण्याच्या कामाला वेग आला आहे. या कामासाठी सुमारे ३५९ कोटी २९ लाख रुपयांची निविदा प्रसिद्ध झाल्याची माहिती आमदार राहुल कुल यांनी दिली.
या कामाच्या मंजुरीसाठी आमदार कुल यांनी मुख्यमंत्री देवेंद्र फडणवीस व जलसंपदा मंत्री राधाकृष्ण विखे पाटील यांच्या समवेत विविध बैठका घेतल्या. तसेच, विधिमंडळाच्या अधिवेशात वेगवेगळ्या आयुधांच्या माध्यमातून हा प्रश्न उपस्थित करून शासनाचे लक्ष वेधले होते. जनाई- शिरसाई उपसा सिंचन योजना या प्रकल्पांतर्गत नवीन मुठा उजव्या कालव्याद्वारे वरवंड व शिर्सुफळ या दोन तलावात पाणी सोडून तेथून उपसा करून जनाई व शिरसाई या दोन उपसा सिंचन योजना प्रस्तावीत आहेत. या योजनेद्वारे दौंड, बारामती व पुरंदर असे एकूण तीन तालुक्यातील १४०८० हेक्टर क्षेत्राला सिंचनाचा लाभ मिळणार आहे. तसेच, जनाई उपसा सिंचन योजनेच्या लाभक्षेत्रातील १८ व शिरसाई उपसा सिंचन योजनेच्या लाभक्षेत्रातील ४७ असे एकूण ६५ तलाव पावसाळ्यात वाहून जाणाऱ्या अतिरिक्त पाण्याने भरून देण्याचे प्रस्तावित आहे. जनाई उपसा सिंचन योजनेतून ८,३५० हेक्टर आणि शिरसाई योजनेतून ५,७३० हेक्टर शेतजमिनींना पाणी उपलब्ध करून दिले जाणार आहे. दौंड, बारामती व पुरंदर तालुक्यातील ४० पेक्षा अधिक गावांना फायदा होणार असून, पाणीटंचाईची समस्या दूर होणार आहे.

ही योजना अवर्षणग्रस्त गावांसाठी सुरू केली असून, या योजनेमुळे सिंचनक्षमतेत मोठी वाढ होणार आहे. कालवे उघड्या स्वरूपाचे असल्याने डोंगराळ आणि मुरमाड जमिनीत पाणी गळती मोठ्या प्रमाणात होते. बंदिस्त नलिका प्रणालीमुळे पाणी बचत, गळती रोखणे, भूसंपादन टाळणे आणि सिंचन क्षेत्रवाढ या सर्व बाबी साधता येणार आहेत. राज्य सरकारने या कामासाठी सुमारे ४३८ कोटी ४७ लाख ८७ हजार ४८३ रुपयांचा निधी मंजूर केला होता, काम पूर्ण झाल्यानंतर पुढील ५ वर्षांसाठी देखभाल दुरुस्ती व भूसंपादनाचा खर्च निविदा रक्कमेतून कमी करण्यात आला आहे.
- राहुल कुल, आमदार

03076