लोणी देवकर, ता. ९ : वरकुटे बुद्रुकमधील (ता.इंदापूर) शिंदेवस्ती येथील अजिंक्य विजय शिंदे यांच्या शेतातील कोंबडी शेडमध्ये अज्ञात प्राण्याचे हल्ला केला. या हल्ल्यात सुमारे दोन हजार ५०० हून अधिक कोंबड्या मृत्युमुखी पडल्या. यामुळे शेतकऱ्याचे अंदाजे दोन लाख रुपयांचे नुकसान झाले. ही घटना
गुरुवारी (ता. ७) रात्री घडली.

अजिंक्य शिंदे यांनी दिलेल्या माहितीनुसार,पोल्ट्री शेड मध्ये एक महिन्यांपेक्षा जास्त दिवसांची तीन हजारांहून अधिक कोंबड्यांची पिल्ले होती. शेडच्या जाळ्या तोडून गुरुवारी रात्री अज्ञात प्राण्याने आत प्रवेश केला. हल्ला करून काही कोंबड्या फस्त केल्या. हल्ल्याच्या भीतीने शेकडो कोंबड्या जागीच मृत्युमुखी पडल्या. शेडमध्ये एक महिन्यापेक्षा अधिकच्या वयाच्या कोंबडी पक्ष्यांचे संगोपन सुरू होते. आत्तापर्यंत कोंबडी पक्षी खरेदी व त्यांच्यासाठीच्या खाद्य खर्चापोटी दोन लाखांहून अधिक रक्कम खर्च झाली आहे. सदर नुकसानीमुळे मोठा आर्थिक फटका बसला आहे.
दरम्यान, या घटनेची माहिती वन विभागाला मिळाल्यानंतर वनपाल व त्यांच्या सहकाऱ्यांनी घटनास्थळी भेट देऊन पाहणी केली. याबाबत पोल्ट्री चालकास कार्यालयात व ऑनलाइन अर्ज देण्याचे सांगत पुढील कारवाईचे आश्वासन दिले.

रात्रीच्या वेळी पक्ष्यांची खाद्य व पाण्याची व्यवस्था करून शेतातून घरी गेल्यानंतर सकाळी शेड वर आल्यानंतर घडलेला सर्व प्रकार समजला. पाळीव कोणत्याही प्राण्याला पोल्ट्री शेडची जाळी तोडता येणार नाही एवढी ती मजबूत आहे. या प्रकरणाची तातडीने शहानिशा वनविभागाने करून नुकसान भरपाई द्यावी.
अजिंक्य शिंदे, पोल्ट्री चालक, वरकुटे बुद्रुक