मंचर, ता. १२ : मंचर कृषी उत्पन्न बाजार समितीत बुधवारी (ता. ११) रात्री झालेल्या लिलावात मेथीला प्रतिजुडी ४४ रुपये उच्चांकी दर मिळाला.
कळंब (ता. आंबेगाव) येथील शेतकरी सिद्धेश संजय भालेराव यांच्या मेथीला हा दर मिळाला, अशी माहिती मंचर बाजार समितीचे सभापती नीलेश थोरात यांनी दिली.
मेथीच्या तुलनेत इतर भाजीपाल्यांनाही समाधानकारक दर मिळत असून, कोथिंबिरीला प्रतिजुडी २१ रुपये व शेपूला २२ रुपये दर मिळाला आहे. गेल्या काही आठवड्यांपासून पडत असलेल्या पावसामुळे विशेषतः धना व मेथी पिकाचे मोठे नुकसान झाले आहे. मात्र, ज्या शेतकऱ्यांचा माल वाचला आहे, त्यांना चांगला भाव मिळत आहे, असे बाजार समितीचे उपसभापती सचिन पानसरे यांनी सांगितले.
व्यापाऱ्यांच्या मते, सध्या मागणी अधिक असून पुरवठा कमी असल्यामुळेच बाजारभाव कडाडले आहेत. याभागातील कोथिंबीर व मेथीला सुरत, मुंबई व पुणे भागातून मोठ्याप्रमाणात मागणी आहे.