मंचर, ता. १४ : आंबेगाव तालुक्यातील आदिवासी डोंगरी भागातील साकारमाच (आहुपे) गावाच्या पुनर्वसनाचा प्रस्ताव येत्या आठ दिवसांत आवश्यक माहितींसह केंद्र सरकारकडे सादर करण्याचे निर्देश उपमुख्यमंत्री अजित पवार यांनी राज्य सरकारला दिले.
मुंबई येथील मंत्रालयात अजित पवार यांच्या अध्यक्षतेखाली झालेल्या बैठकीत हा निर्णय घेण्यात आला. या पुनर्वसनासाठी गेल्या अनेक वर्षांपासून प्रयत्न सुरू आहेत. सन २०१४ मध्ये माळीणप्रमाणेच साकारमाच येथेही भूस्खलनाची शक्यता निर्माण झाल्याने प्रशासनाने तातडीने तात्पुरत्या निवाऱ्याची व्यवस्था केली होती. त्यानंतर वन विभागाकडून पुनर्वसनाचा प्रस्ताव केंद्राकडे पाठवला गेला होता. मात्र, धोरणात्मक बदलांमुळे अद्याप मंजुरी मिळाली नसल्याचे माजी गृहमंत्री दिलीप वळसे पाटील यांनी निदर्शनास आणून दिले. पाऊस सुरु झाला की सर्व गावकरी भयभीत होतात, असे आंबेगाव पंचायत समितीचे माजी सभापती संजय गवारी यांनी सांगितले.
साकारमाच पुनर्वसनाबाबत तातडीने कार्यवाही करण्याच्या सूचना अजित पवार यांनी उच्च पदस्थ अधिकाऱ्यांना दिल्या. यावेळी बैठकीला मदत व पुनर्वसन, वन, अर्थ विभागांचे सचिव, जिल्हाधिकारी जितेंद्र डूडी, जिल्हाधिकारी ठाणे, प्रकाश घोलप, संजय गवारी, संदीप चपटे, प्रवीण पारधी, साकारमाचचे ग्रामस्थ कल्पेश येंधें व दीपक येंधें उपस्थित होते.