मंचर, ता. २२ : ‘‘एकात्मिक आदिवासी विकास प्रकल्प अधिकारी, घोडेगाव यांच्या अखत्यारितील नागापुर (ता. आंबेगाव) येथील सैन्य व पोलिस दल भरतीपूर्व प्रशिक्षण केंद्रात अनुसूचित जमातीच्या युवकांना चार महिन्यांचे मोफत प्रशिक्षण दिले जाणार आहे. येथील प्रवेश मुदतवाढीसाठी अनेक विद्यार्थी व सामाजिक संघटनांनी विनंती केली होती. संबधितांच्या मागणीनुसार प्रशिक्षण घेऊ इच्छिणाऱ्यांसाठी शुक्रवार (ता. २६ सप्टेंबर) संध्याकाळी साडेसहा वाजेपर्यंत प्रवेश कालावधी वाढवला आहे,’’ अशी माहिती घोडेगाव (ता.आंबेगाव) येथील एकात्मिक आदिवासी विकास प्रकल्प कार्यालयाचे प्रकल्प अधिकारी प्रदीप देसाई यांनी दिली.
देसाई पुढे म्हणाले की, पुणे, सातारा, सांगली व कोल्हापूर या जिल्ह्यातील इच्छुक अनुसूचित जमातीच्या युवकांनी आपले अर्ज एकात्मिक आदिवासी विकास प्रकल्प घोडेगाव येथील कार्यालयात जमा करावे. इयत्ता १२ वी उत्तीर्ण विद्यार्थ्यांना दिल्या जाणाऱ्या या प्रशिक्षणाची पहिली बॅच ९ ऑक्टोबर पासून सुरू होणार असून अर्ज केलेल्या उमेदवारांची लेखी व मैदानी चाळणी परीक्षा ६ व ७ ऑक्टोबर या दिवसांत प्रशिक्षण केंद्रावर होणार आहे. त्यानंतर प्रशिक्षणार्थींची अंतिम निवड यादी प्रसिद्ध करण्यात येईल. निवड झालेल्या प्रशिक्षणार्थींसाठी निवास व भोजनाची मोफत सोय करण्यात येणार आहे. प्रकल्प कार्यालयात प्रशिक्षणासाठीचे अर्ज विनामूल्य उपलब्ध करून देण्यात आले आहेत. राज्य शासनाने पोलिस शिपाई भरती प्रक्रिया सुरू केली असल्याने या प्रशिक्षणाचा गरजू आदिवासी युवकांनी लाभ घ्यावा.