मंचर, ता. २२ : अवसरी खुर्द (ता. आंबेगाव) येथील शासकीय तंत्रनिकेतन व अभियांत्रिकी महाविद्यालय परिसरातील मंजूर पोलिस चौकी, तसेच गावठाण व ओढ्यावरील पूल- सिमेंट रस्ता आदी कामे मार्गी लावली जातील, असे माजी सहकार मंत्री दिलीप वळसे पाटील यांनी सांगितले.
अवसरी खुर्दचे सरपंच वैभव वायाळ, उपसरपंच प्रवीण भोर, सदस्य जगदीश अभंग, प्रसाद कराळे, सचिन ढोणे यांच्यासह ग्रामस्थांच्या शिष्टमंडळाने रविवारी (ता. २१) मंचर येथे वळसे पाटील यांची भेट घेतली. अवसरी खुर्द गावठाण- अभंगमळा ओढ्यावरील नवीन पूल, स्मशानभूमी ते महाविद्यालय रस्ता सिमेंट काँक्रिटीकरण, मयुरेश्वर मंदिर व प्राथमिक आरोग्य केंद्र सुशोभीकरण अशा विविध कामांसाठी निधी मिळावा, अशी मागणी ग्रामस्थांनी केली.
वळसे पाटील यांनी तत्काळ संबंधित विभागांशी दूरध्वनीवरून संपर्क साधून अंदाजपत्रक तयार करण्याच्या सूचना दिल्या. सहा महिन्यांपूर्वी पोलिस चौकीची मंजुरी मिळाली असली तरी इमारत नसल्याने अद्याप चौकी कार्यान्वित झाली नाही. येथे राज्यातील व परराज्यातील चार हजाराहून अधिक विद्यार्थी शिक्षण घेतात. गेल्या काही वर्षांत बाहेरील आलेल्या तरुणांमुळे वाद, हाणामारीच्या घटना घडलेल्या आहेत. या पार्श्वभूमीवर विद्यार्थ्यांच्या सुरक्षिततेच्या दृष्टीने पोलिस चौकी होणे गरजेचे असल्याचे ग्रामस्थांनी सांगितले.