मंचर, ता.२८ : आंबेगाव तालुक्यातील मंचर नगरपंचायत सार्वत्रिक निवडणूक २०२५ करिता प्रभागनिहाय प्रारूप मतदार याद्यांवर आक्षेप नोंदविण्याची मुदत राज्य शासनाने शुक्रवार (ता.१७) पर्यंत निश्चित केली होती. या कालावधीत नगरपंचायत कार्यालयाकडे एकूण एक हजार ३२९ हरकत अर्ज प्राप्त झाले आहेत. त्यापैकी मतदारांच्या वैयक्तिक हरकतींसाठी ‘अ’ नमुन्यात ९२१ अर्ज, तर त्रयस्थ तक्रारदारांकडून ‘ब’ नमुन्यात ४०८ अर्ज दाखल झाले आहेत. या सर्व हरकतींचे निराकरण करण्यासाठी नगरपंचायतीकडून प्रत्यक्ष स्थळ पाहणी सुरू असून, स्थळपाहणी पंचनाम्यावर संबंधित मतदारांची स्वाक्षरी घेतली जात आहे. सर्व प्राप्त हरकतींचे निपटारा पूर्ण झाल्यानंतर शुक्रवारी (ता.३१) प्रभागनिहाय अंतिम मतदार याद्या प्रसिद्ध केल्या जाणार असल्याची माहिती मंचर नगरपंचायत प्रशासनाकडून देण्यात आली आहे.