मंचर, ता. १९ : मंचर (ता. आंबेगाव) नगरपंचायत निवडणुकीत प्रभाग क्रमांक १मधून अपक्ष व राष्ट्रवादी काँग्रेस पुरस्कृत उमेदवार माजी खासदार (स्व.) किसनराव बाणखेले यांच्या सून वंदना कैलास बाणखेले यांना बिनविरोध निवडून देण्यासाठी शिवसेनेच्या (शिंदे) उमेदवाराने आपला अर्ज मागे घेण्याचा निर्णय घेतला आहे. ही घोषणा आमदार शरद सोनवणे यांनी बुधवारी (ता. १९) मंचर येथे पत्रकार परिषदेत केली.
प्रभाग १मधील शिवसेना उमेदवार शिल्पा अमोल काजळे यांनी वंदना बाणखेले यांच्या उमेदवारीस समर्थन देत माघार घेणार असल्याचे जाहीर केले आहे. बाणखेले कुटुंबाचा सन्मान राखण्यासाठी हा निर्णय घेतल्याचे सोनवणे यांनी सांगितले आहे. पत्रकार परिषदेत शिवसेनेचे जिल्हाप्रमुख देविदास दरेकर, तालुकाप्रमुख प्रवीण थोरात पाटील, दत्ता गांजाळे, वैभव पोखरकर, बाजीराव मोरडे आदी उपस्थित होते.