मंचर, ता. १८ : मावळ तालुक्यातील तहसीलदार, मंडल अधिकारी व कामगार तलाठी यांना अन्यायकारक पद्धतीने निलंबित केल्याचा आरोप करत त्यांना तातडीने सेवेत पुनर्नियुक्त करावे, तसेच नायब तहसीलदार ग्रेड पे, कालबद्ध पदोन्नती व तहसीलदार ग्रेड पे आदी मागण्यांच्या पूर्ततेसाठी आंबेगाव तालुक्यातील महसूल विभागातील कर्मचारी बेमुदत संपावर गेले आहेत.
या आंदोलनात कामगार तलाठी, मंडल अधिकारी व इतर महसूल कर्मचारी, असे एकूण ९६ कर्मचारी सहभागी झाले असून, त्यामुळे तालुक्यातील १०३ गावांचे महसूल कामकाज पूर्णतः ठप्प झाले आहे. परिणामी सामान्य नागरिकांसह शेतकरी वर्गाची मोठ्या प्रमाणावर गैरसोय होत आहे.
खरेदी-खत नोंदी, वारसा नोंदी, दाव्यांच्या सुनावण्या, सातबारा उतारे, फेरफार नोंदी, पीक पाहणी, नुकसानभरपाई प्रस्ताव, विविध दाखले आदी कामे पूर्णतः प्रलंबित राहिली आहेत. आवश्यक कागदपत्रे वेळेत न मिळाल्याने शेतकऱ्यांमध्ये तीव्र नाराजी व्यक्त होत आहे.