महाळुंगे पडवळ, ता.१७ : “शेतकऱ्यांनी पारंपरिक पद्धती ऐवजी आधुनिक ऊसाची शेती करण्याकडे वळावे. वसंत दादा शुगर इन्स्टिट्यूटने विकसित केलेली औषधे आणि भीमाशंकर कारखान्याने जैविक प्रयोगशाळेत उत्पादित केलेली जिवाणू खतांचा वेळोवेळी वापर करावा. या लागवड हंगामापासून भीमाशंकर कारखाना कृत्रिम बुद्धिमत्ता (ए आय) तंत्रज्ञानावर आधारित ऊस शेतीचा अवलंब करणार आहे,’’ असे कारखान्याचे ऊस विकास अधिकारी सोमेश्वर दीक्षित यांनी सांगितले.
चांडोली बुद्रुक (ता.आंबेगाव) येथील हनुमान मंदिर सभागृहात भीमाशंकर कारखान्यामार्फत ऊस विकास योजना, आडसाली लागवड, व्यवस्थापन आणि भविष्यातील एआय तंत्रज्ञानावर आधारित ऊस शेती या विषयावर दीक्षित यांनी मार्गदर्शन केले. ते म्हणाले, चांडोली बुद्रुक, दत्तात्रेय गोविंदराव वळसे पाटील लक्ष २०२० च्या हेक्टरी १३० मेट्रिक टन सरासरी ऊस उत्पादनाचे उदिष्ट असलेल्या महत्वाकांक्षी ऊस योजनेचा शेतकऱ्यांनी लाभ घ्यावा. शेतकऱ्यांनी पारंपरिक पद्धतीने ऊस लागवड करू नये. नर्सरीतील प्रामाणित ऊस रोपांची लागवड, ठिबक सिंचनाचा अवलंब, एकात्मिक खत, तण आणि कीड व्यवस्थापणाचा अवलंब करावा. कृत्रिम बुद्धिमत्ता तंत्रज्ञानावर आधारित ऊस शेतीचा अवलंब करणार आहे. त्यासाठी कारखान्याचे कर्मचारी या तंत्रज्ञानाची माहिती शेतकऱ्यांना बांधावर जाऊन देण्याचे काम करतील.

कार्यक्रमाला मंचर कृषी उत्पन्न बाजार समितीचे संचालक संदीप थोरात, सरपंच सोमनाथ केदारी, भीमाशंकर कारखान्याचे संचालक अरुण चासकर, अंकित जाधव, दादाभाऊ पोखरकर, ग्रामपंचायत सदस्य गोविंद थोरात, ज्ञानेश्वर थोरात, पोपट थोरात यांच्यासह शेतकरी उपस्थित होते. आडसाली लागवड, व्यवस्थापन व विविध योजनांची माहिती ऊस पुरवठा अधिकारी दिनकर आदक यांनी दिली. शेतकऱ्यांनी उपस्थित केलेल्या प्रश्नांना ज्येष्ठ संचालक दादाभाऊ पोखरकर यांनी उत्तरे दिली.
सूत्रसंचालन अशोक भोर व आभार संदीप थोरात यांनी मानले. कार्यक्रमाचे संयोजन कळंब गट प्रमुख महेंद्र वाळुंज, अक्षय शेळके, प्रवीण घेवडे, भास्कर सैद आणि नितीन कोल्हे यांनी केले.

03110