महाळुंगे पडवळ, ता.१२ : चास (ता. आंबेगाव) येथे भरवस्तीत बिबट्याने केलेल्या हल्ल्यात एक वर्ष वयाची कालवड ठार झाली आहे. गुरुवारी (ता. ११) रात्री आठ वाजता ही घटना घडली. वनविभागाने बिबट्याला जेरबंद करण्यासाठी पिंजरा लावावा, अशी मागणी शेतकऱ्यांनी केली आहे.
शेगरमळा येथे बजरंग ज्ञानदेव शेगर यांच्या घरालगत मालकीचा गाईंचा मुक्त गोठा आहे. या गोठ्यात १५ ते २० गायी आणि कालवडी तसेच कोंबड्या आहेत. गुरुवारी रात्री आठ वाजण्याच्या सुमारास बिबट्याने कालवडीवर हल्ला करून ठार केले आहे. शेतकऱ्याचे १५ ते २० हजार रुपयांचे नुकसान झाले आहे. वनविभागाला बिबट्याने हल्ला केल्याची माहिती देण्यात आली. या परिसरात वारंवार घडणाऱ्या घटनांमुळे पशुपालक शेतकरी अडचणीत आले आहेत.
शेगरमळ्यात गेल्या दोन ते तीन दिवसांपासून बिबट्याचा वावर आहे. परिसरातील शेतकऱ्यांना दिवसाही बिबट्याने दर्शन दिले आहे. त्यामुळे शेतकऱ्याना शेतात काम करणे धोक्याचे होऊ लागले आहे. वनविभागाकडे बिबट्यांना पकडण्यासाठी पिंजरा लावण्याची मागणी केली आहे. परंतु या मागणीकडे दुर्लक्ष होत असल्याची तक्रार चास राष्ट्रवादी कॉंग्रेस पक्षाचे अध्यक्ष बन्सी शेगर यांनी केली आहे.