महुडे : वाढाणे (ता. भोर) येथील राहत्या घराशेजारी चरायला सोडलेल्या जर्सी जातीच्या गाभण असलेल्या कालवडीचा बिबट्याच्या हल्ल्यात मृत्यू झाला. ही घटना बुधवारी (ता.३) सकाळी घडली. गावठाणापासून काही अंतरावर शेतकरी अशोक सीताराम बोडके यांचे घर आहे. बोडके यांनी नेहमीप्रमाणे घराशेजारी तांबुटा या ठिकाणी सकाळी चरायला सोडलेली गुरे तीन तासांनी घरी आणायला गेल्यावर त्यांना त्यातील गाभण असलेली कालवड मृत आढळून आली. कालवडी वरील जखमा पाहून बिबट्याचा हल्ला झाल्याची खात्री झाल्याचे लक्षात आले. घरापासून काही अंतरावर बिबट्याच्या हल्ल्यात गाभण कालवडीच्या मृत्यूने शेतकऱ्यांचे आर्थिक नुकसान झाले असून ग्रामस्थांमध्ये भीतीचे वातावरण निर्माण झाले आहे. वनविभागाने शेतकऱ्याला नुकसान भरपाई द्यावी. तसेच बिबट्याचा बंदोबस्त करण्याच्या उपाययोजना करावी, अशी मागणी बापू बोडके यांनी केली आहे.