महुडे, ता. ११ : संगमनेर (ता. भोर) ग्रामपंचायतीच्या सरपंच सायली महेंद्र साळुंके यांनी कर्तव्य पालनात जाणूनबुजून कसूर व हलगर्जीपणा केल्याबद्दल विभागीय आयुक्त डॉ. चंद्रकांत पुलकुंडवार यांनी त्यांच्या उर्वरित कालावधीसाठी सरपंच व सदस्यपदावरून काढून टाकण्यात येत असल्याचा आदेश ८ डिसेंबर दिला.
संगमनेर येथील हनुमंत राजाराम गायकवाड आणि निखिल हनुमंत गायकवाड यांनी सरपंच साळुंके यांच्या कुटुंबीयांनी वहिवाटीच्या रस्त्यावर अनधिकृत बांधकाम करून जीना काढल्याबद्दल तक्रार केली होती. याबाबत सरपंच यांनी कार्यवाही केली नाही. याप्रकरणी झालेल्या चौकशीत, सरपंच यांच्या कुटुंबांने सक्षम प्राधिकारी यांची पूर्वपरवानगी न घेता बांधकाम केल्याचे उघड झाले. तसेच, ग्रामपंचायतीने महाराष्ट्र ग्रामपंचायत अधिनियम १९५९च्या कलम ५२अन्वये कार्यवाही केली नाही. विभागीय आयुक्तांनी जिल्हा परिषदेच्या मुख्य कार्यकारी अधिकाऱ्यांच्या अहवालाचे व दोन्ही बाजूंच्या युक्तिवादाचे अवलोकन केल्यानंतर सरपंच साळुंके यांनी पदाच्या विहित कर्तव्य पालनात कसूर व हलगर्जीपणा केल्याचे मत नोंदवले. त्यानुसार महाराष्ट्र ग्रामपंचायत अधिनियम, कलम ३९ (१) नुसार त्यांना पदावरून दूर केल्याचे आदेश दिले.