महुडे, ता. १७ : शिंद (ता. भोर) येथील आरोग्य उपकेंद्रात मुख्यमंत्री समृद्ध पंचायतराज अभियानामार्फत पंचायत समितीच्या आरोग्य विभाग व शिंद, नांद व गवडी ग्रामपंचायत यांच्या वतीने ॲनिमिया मुक्त गाव अभियान अंतर्गत बुधवारी (ता. १७) घेतलेल्या आरोग्य शिबिरात ६६ महिलांची तपासणी करण्यात आली.
उपकेंद्राच्या समुदाय आरोग्य अधिकारी डॉ. प्रज्ञा वऱ्हे यांनी शिंद, नांद गवडी येथील एकल महिलांसह इतर महिलांची आरोग्य तपासणी केली. यात प्रामुख्याने असंसर्गजन्य आजार, क्षयरोग, कुष्ठरोग, नेत्ररोग, हिमोग्लोबिन तपासणी करून उपचार व संदर्भ सेवा देण्यात आली. दरम्यान, सरपंच शंकर माने व सदस्य किसन कोंढाळकर यांनी शिबिरास भेट दिली. यावेळी ग्रामपंचायत अधिकारी महादेव सालगुडे, आरोग्य सेविका शुभांगी लडकत, आरोग्य सेवक भास्कर चिंचकर, पांडुरंग देशमुखे, आरोग्य सहाय्यक जगन्नाथ खुडे, अर्धवेळ स्त्री परिचारिका जयश्री भोमे व सर्व आशासेविका उपस्थित होत्या.

शिंद (ता. भोर) : आरोग्य शिबिर प्रसंगी उपस्थित महिला व आरोग्य विभाग.