नारायणगाव, ता. ३१: चारा खाल्ल्यानंतर विषबाधा झाल्याने पळशी वनकुटे (ता. पारनेर) येथील सहादू पावसू खरात या मेंढपाळाच्या नऊ मेंढ्यांचा तडफडून मृत्यू झाला. नारायणगाव (ता. जुन्नर) येथील पाटे-खैरे मळा रस्त्यालगत ही घटना गुरुवारी (ता. ३१) दुपारी बारा वाजण्याच्या सुमारास झाली. यामुळे मेंढपाळाचे सुमारे दोन लाख रुपयांचे नुकसान झाले. यावेळी मेंढपाळ महिलेचा आक्रोश पाहून उपस्थित नागरिक मदतीसाठी सरसावले.
मेंढपाळ सहादू खरात हे मेंढ्या चारण्यासाठी जुन्नर तालुक्यात आले आहेत. बुधवारी रात्री त्यांनी नारायणगाव येथील कुकडी वसाहतीत मेंढ्यांचा वाडा लावला होता. पाटे-खैरे मळा रस्त्यालगत दुपारी बारा वाजण्याच्या सुमारास मेंढ्या चरत असताना शंभर मेंढ्यापैकी दहा मेंढ्या चक्कर येऊन खाली पडल्या. त्यांना उलटी झाली. काही क्षणातच नऊ मेंढ्याचा मृत्यू झाला. या बाबतची माहिती येथील स्वप्नील पाटे, राकेश खैरे, जालिंदर खैरे यांनी तत्काळ पशुवैद्यक डॉ. प्रणेश ढवळे यांना दिली. डॉ. ढवळे यांनी मेढ्यांवर उपचार केले. मात्र, नऊ मेंढ्या उपचारापूर्वीच मृत झाल्या. यामुळे मेंढपाळाचे मोठे आर्थिक नुकसान झाले. जिवापाड प्रेम असलेल्या मेढ्यांचा मृत्यू झाल्याने मेंढ पाळा सोबत असलेल्या महिलांनी आक्रोश केला. पाणी किंवा चाऱ्याच्या माध्यमातून विषबाधा झाल्यामुळे मेढ्यांचा मृत्यू झाला असल्याचा प्राथमिक अंदाज आहे. विच्छेदन केल्यानंतरच मृत्यूचे खरे कारण लक्षात येईल, अशी माहिती डॉ.ढवळे यांनी दिली.